Извештај: Кина инвестираше речиси 24 милијарди долари во 168 пристаништа низ светот во 25 години

ИСТАНБУЛ (АА) - Кина инвестираше речиси 24 милијарди долари во 168 пристаништа низ светот во период од 25 години, покажува новиот извештај објавен вчера, пренесува Анадолу.

Извештајот на ЕјдДата, истражувачка лабораторија при Универзитетот „Вилијам и Мери“ во САД, доаѓа откако Панама неодамна исфрли оператор од Хонгконг од едно од своите пристаништа.

Во периодот помеѓу 2000 и 2025 година Кина насочи речиси 24 милијарди долари во финансирања поврзани со морски пристаништа, во 168 пристаништа во 90 земји со низок, среден и висок приход, се наведува во извештајот насловен „Зацврстување на глобалните амбиции“.

Средствата, во вкупен износ од 23,4 милијарди долари, биле обезбедени со 363 кинески проекти финансирани преку кредити и грантови во текот на овој период.

Во извештајот се прецизира дека меѓу најфинансираните пристаништа се меѓународното пристаниште Хамбантота во Шри Ланка - 1,97 милијарди долари, пристаништето Њукасл во Австралија - 1,32 милијарди долари и пристаништето Криби во Камерун - 1,17 милијарди долари.

На листата се наоѓаат и пристаништето Мелбурн во Австралија - 1,14 милијарди долари и пристаништето Хаифа во Израел - 1,13 милијарди долари.

Во извештајот се наведува дека само во изминатите две години (2024 и 2025 година), Кина издвоила 614 милиони долари ново финансирање за проекти и активности во 11 пристаништа низ светот.

Кинеското финансирање на глобалните морски пристаништа е „речиси рамномерно поделено“ помеѓу земјите со висок приход и земјите со низок и среден приход, се наведува во извештајот.

Во извештајот се истакнува дека 45,1 отсто од портфолиото на Кина за финансирање прекуокеански морски пристаништа, во вредност од 10,8 милијарди долари, поддржува 29 пристанишни локации во 20 земји со висок приход, меѓу кои Шпанија, Австралија, Нов Зеланд, Сингапур и Брунеи.

Извештајот е објавен во време кога Панама, под притисок на Соединетите Американски Држави, го раскинува договорот со компанијата „ЦК Хачисон“ со седиште во Хонгконг.

- Поврзување на поморските активности со пристаништата финансирани од Кина

Во извештајот, исто така, се анализирани и кинеските поморски активности во пристанишните објекти финансирани од Пекинг.

Во него се наведува дека кинеските поморски активности, вклучително закотвување на бродови, посети на болнички бродови и заеднички вежби, се одвивале во повеќе од половина од пристаништата финансирани од Кина, каде што кинески субјекти, исто така, се јавуваат како сопственици или оператори.

„Постои значително помала кинеска поморска активност во пристанишните објекти финансирани од Кина, кои не се во сопственост или под управување на кинески субјекти“, се наведува во извештајот.

Во извештајот, исто така, се идентификувани дополнителни 11,6 милијарди долари предвидени за финансирање на потенцијални или идни проекти во 30 пристаништа, меѓу кои пристаништата Монгла во Бангладеш и Кисуму во Кенија.

Кинески државни кредитори често го поддржуваат купувањето пристанишна опрема, како што се безбедносни скенери или дигалки обезбедени од кинески компании, вклучително „Нуктек“ и „ЗПМЦ“, се вели во извештајот.

Кинеските кредитори имаат насочено 4,7 милијарди долари во пристанишни проекти што вклучуваат таква опрема.

Истражувачите идентификуваа 19 рудници финансирани од Кина во радиус од 500 километри од морските пристаништа финансирани од Пекинг.