ИСТАНБУЛ (АА) – Ирански официјален претставник изјави дека во моментот „нема простор за дипломатија“ и дека Техеран е подготвен за долготрајна војна со САД, додавајќи дека Иран може да продолжи со напади врз земјите од Персискиот Залив со цел да изврши притисок тие да побараат од Вашингтон да се повлече од конфликтот.

Камал Харази, советник за надворешна политика во Кабинетот на врховниот лидер на Иран, во интервју за „Си-ен-ен“ доцна синоќа изјави дека дипломатијата во моментов не е опција и дека војната може да заврши само доколку економскиот притисок ги натера другите земји да интервенираат.

„Не гледам повеќе простор за дипломатија. Затоа што Доналд Трамп ги доведуваше во заблуда другите и не ги исполнуваше своите ветувања, а тоа го искусивме во два наврати за време на преговорите – додека ние преговаравме, тие нѐ нападнаа“, изјави Харази.

„Нема простор за тоа освен ако економскиот притисок не се зголеми до степен што другите земји ќе интервенираат за да се гарантира прекин на агресијата на Американците и Израелците против Иран“, додаде тој.

Харази посочи дека земјите од Персискиот Залив и другите држави треба да извршат притисок врз Вашингтон за да се стави крај на конфликтот.

„Оваа војна создава голем притисок – економски притисок – врз другите, во однос на инфлацијата и недостигот на енергија. Ако продолжи, овој притисок дополнително ќе се зголеми и другите нема да имаат избор освен да интервенираат“, рече тој.

На прашањето дали иранското воено и политичко раководство остануваат обединети, Харази одговори потврдно.

„Да, токму така“, рече тој.

„Одговорноста на лидерот на Исламската Република Иран е да ја води одбранбената способност на земјата, и како што тоа го правеше ајатолахот Али Хамнеи, така ќе постапува и новиот лидер“, додаде Харази.

Американскиот претседател Доналд Трамп минатата недела изјави дека назначувањето на Моџтаба Хамнеи за наследник на неговиот татко е „неприфатливо“.

„Тоа не е негова работа“, рече Харази.

Интервјуто доаѓа во момент кога регионалната ескалација се интензивира откако Израел и САД на 28 февруари изведоа заеднички напад врз Иран, при што, според иранските власти, досега се убиени повеќе од 1.200 луѓе, меѓу кои и врховниот лидер, ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив во кои се наоѓаат американски воени бази.

Во меѓувреме, Иран го затвори Ормускиот Теснец – стратегиски морски премин што го поврзува Персискиот Залив со Арапското Море. Преку него вообичаено се транспортираат околу 20 милиони барели нафта дневно, како и околу 20 отсто од глобалната трговија со течен природен гас, најголем дел наменет за азиските пазари.

Прекинот на транспортот ги принудува извозниците да бараат алтернативни маршрути за испорака, додека истовремено се ограничува и извозот на хранливи материи за земјоделството што се користат во производството на ѓубрива.

Овој шок во снабдувањето, заедно со растечките трошоци за енергија и транспорт, се очекува дополнително да изврши притисок врз глобалните синџири на снабдување со храна и да придонесе за повисоки цени на храната во светски рамки.