БЕРЛИН (АА) - Германскиот канцелар Фридрих Мерц јавно му се заблагодари на американскиот претседател Доналд Трамп за неговите напори за посредување меѓу Украина и Русија по неговиот денешен телефонски разговор со претседателот на Украина Владимир Зеленски, пренесува Анадолу.

„Разговарав со претседателот Зеленски за (вчерашната) средбата меѓу специјалниот претставник на САД (Стив) Виткоф и (рускиот претседател Владимир) Путин“, напиша Мерц на X. „И двајцата сме благодарни на американскиот претседател за неговите напори за посредување и сме во близок контакт со Соединетите Американски Држави и нашите европски партнери“.

Телефонскиот разговор следуваше по посетата на Виткоф на Москва, каде што се состана со Путин, средба која траеше приближно три часа. По средбата, двете страни изјавија дека Трамп и Путин ќе се сретнат „во наредните денови“ за да разговараат за војната во Украина.

Портпаролот на германската Влада, Стефан Корнелиус, изјави дека за време на телефонскиот разговор меѓу Мерц и Зеленски, лидерите темелно разговарале за неодамнешните дипломатски случувања.

„Двајцата лидери ги пофалија напорите за посредување на американскиот претседател и се согласија дека Русија мора да стави крај на својата војна на агресија, која го крши меѓународното право“, рече портпаролот. „Тие се согласија да одржуваат близок контакт со европските партнери и со САД. Германскиот канцелар го увери украинскиот претседател во неговата континуирана поддршка“, додаде тој.