СКОПЈЕ (АА) – Претседателката на Косово, Вјоса Османи, денес во Приштина се состана со специјалниот претставник на Европската Унија за дијалогот помеѓу Косово и Србија, Петер Соренсен, кој престојува во официјална посета на Косово, јавува Анадолу.

Како што соопшти Османи преку објавата на социјалната мрежа Х, на средбата се разговарало за најновите политички случувања во земјата, важноста на унапредувањето на евроинтегративниот процес на Косово, како и за тековниот дијалог со Србија под покровителство на Европската Унија.

„Фер и непристрасен процес на дијалог со јасни цели е од суштинско значење за мирот и стабилноста во регионот“, напиша Османи.

Во фокус на разговорот била и потребата од укинување на, како што наведе, неправедните мерки против граѓаните на Косово, како и произволните апсења на косовски државјани од страна на Србија.