АНКАРА (АА) - Камбоџа и Тајланд денес се согласија да спроведат моментален прекин на огнот за да се запрат тринеделните борби во кои загинаа десетици, а голем број се повредени, соопштија официјални лица, известува Анадолу.

Договорот беше објавен во заедничко соопштение издадено по состанокот на 3-тиот Специјален општ граничен комитет, тело чии копретседатели се министрите за одбрана на двете земји од Југоисточна Азија, наведе канцеларијата на премиерот на Камбоџа.

Денес, со почеток во 12:00 часот по локално време (06:00 по средноевропско време), стапи на сила прекинот на огнот.

Според договорот, двете страни се обврзуваат да ги запрат сите вооружени непријателства и да избегнуваат неиспровоциран оган, напредување на трупите или движење кон позициите на другата страна.

Прекинот на огнот важи во сите области по должината на границата и опфаќа воени цели, цивили и инфраструктура, се вели во соопштението.

Според договорот, откако прекинот на огнот ќе биде целосно почитуван 72 часа, Тајланд ќе ги врати во Камбоџа сите 18 војници кои се во тајландски притвор од јули.

Како дел од мерките за деескалација, Камбоџа и Тајланд се согласија да ги одржат своите тековни распоредувања на војници без понатамошни движења, вклучително и патроли кон спротивставени позиции.

Во заедничката изјава се нагласува дека прекинот на огнот не е во спротивност со постојните прашања за демаркација на границата.

Двете земји, исто така, се согласија да продолжат со работата за истражување и демаркација преку Заедничката комисија за граници што е можно поскоро, давајќи им приоритет на погодените гранични области каде што живеат цивили и осигурувајќи ја безбедноста на заедничките тимови за истражување, вклучително и заштита од мини.

Договорот на раселените цивили им овозможува безбедно и достоинствено да се вратат во своите домови и кон изворите за егзистенција.

Претходно во утринските часови, портпаролката на камбоџанското Министерство за одбрана, генерал-потполковник Мали Сочеата, соопштила дека тајландската војска испукала околу 500 артилериски гранати во неколку гранични области, додека беспилотни летала фрлиле 10 боеви глави, а борбени авиони Ф-16 спровеле воздушни напади во близина на цивилни локации, објави државната агенција Камбоџа Прес.

Портпаролката тврдела дека Тајланд, исто така, користел тешка артилерија, ракетни лансери, тенкови, оклопни возила, беспилотни летала и пешадиски единици во нападите врз делови од провинциите Преах Вихер и Одар Минчи.

Сепак, немало непосредна реакција или потврда од тајландската страна на најновото тврдење на Камбоџа.

Околу 99 лица се убиени во текот на изминатите 20 дена откако судирите продолжија на 8 декември, еден ден по граничната престрелка во која беа повредени двајца тајландски војници.

Во борбите беа убиени вкупно 26 тајландски војници и еден цивил. Според тајландските власти во судирите загинале и 41 цивил поради „колатерални ефекти“ за време на граничните судири.

Министерството за внатрешни работи на Камбоџа соопшти дека 31 цивил на Камбоџа биле убиени.

Речиси 1 милион луѓе се раселија од двете страни по обновувањето на судирите.

Тајланд и Камбоџа имаат долгогодишен граничен спор кој постојано прераснува во насилство, вклучувајќи ги и судирите во јули во кои беа убиени најмалку 48 лица.