نەینەوا.. هەڵاتنی ٧٣ خێزانی توركمان لە تەلەعفەر

نەینەوا ــ AA

ئەفسەر لە سوپای عێراق، موقەدەم سەفوان نوعمان حەجار رایگەیاند كە ٧٣ خێزانی توركمان توانیویانە لە قەزای تەلەعفەر لە ژێر كۆنتڕۆڵی داعش هەڵبێن و خۆیان رزگار بكەن.

سەفوان نوعمان حەجار بۆ ئاژانسی ئانادۆڵو گوتی: "لە ئێوارەی دوێنێ‌ دووشەممەوە تا بەرەبەیانی ئەمڕۆ، هێزە عێراقییەكان پێشوازیان لە ٧٣ خێزانی توركمان كردووە كە توانیویانە لە ژێر كۆنتڕۆڵی داعش لە قەزای تەلەعفەر هەڵبێن و خۆیان رزگار بكەن".

سەبارەت بە ئۆپەراسیۆنی كۆنتڕۆڵكردنەوەی قەزای تەلەعفەر، سەفوان نوعمان حەجار گوتی: " بە كۆنتڕۆڵكردنەوەی رێگەی نێوان قەزای تەلەعفەر و شاری مووسڵ لەگەڵ سنووری سووریا، هێزە عێراقییەكان رێگەی گەیاندنی پشتیوانیان لە چەكدارەكانی داعش بۆ ناو تەلەعفەر پچڕاندووە".

ناوبراو باسی لەوەش كرد كە فڕۆكە جەنگییەكانی عێراق و هاوپەیمانێتی نێودەوڵەتی لە بۆردومانكردنی داعش لە قەزای تەلەعفەر بەردەوامن.