ئاگری.. دەریاچەی باڵک بەتەواوەتی بەستوویەتی

ئاگری - AA

دەریاچەی باڵک دەکەوێتە پارێزگای ئاگری-یەوە و لە هەموو وەرزێکدا ژمارەیەکی زۆر گەشتیار بۆخۆی رادەکێشێت، لەئێستاشدا بەهۆی نزمی پلەکانی گەرماوە بەتەواوەتی بەستوویەتی.

دانیشتوانی ناوچەکە بەهۆی دیمەنی دڵڕفێن، باڵندە و ماسییەکانییەوە، دەریاچەکە بە "بەهەشتی شاراوە" ناودەبەن.

لەئێستاشدا دەریاچەی باڵک کە دوو هەزار و ٢٤١ مەتر لە ئاستی رووی دەریاوە بەرزە، بەتەواوی بەستوویەتی و ئەو کەسانەی سەردانی ناوچەکە دەکەن، دەتوانن لەسەر رووکەشی بەستووی دەریاچەکە پیادەڕەوی بکەن و وێنەی یادگاری لەناو ئەو دیمەنە سروشتییە ناوازەیەدا تۆمار بکەن.

یەکێک لەو کەسانەی کە سەردانی دەریاچەکەی کردوە، ناوی مەهمەت گیونەی ئەسەرە و لە لێدوانێکیدا بۆ ئاژانسی ئانادۆڵو باسی لەوە کرد ئەمە جاری یەکەمە سەردانی دەریاچەی باڵک بکات و رایگەیاند: "دەریاچەی باڵک دیمەنێکی ناوازەی هەیە و لێرە وێنەی یادگاری زۆر تۆمار دەکەین. رووکەشی دەریاچەکە بە ئەستووری نزیکەی نیومەتر بووەتە سەهۆڵ. ئێمەش هاتین لێرە چامان خواردەوە و چێشمان لەم دیمەنە سروشتییە وەرگرت".

یەکێکی دیکە لە گەشتیارەکان بە ناوی مەهمەت سانجاک لە لێدوانێکیدا باسی لەوە کرد کە لەسەر رووکەشی دەریاچەکە خلیسکێنەیان کردوە و رایگەیاند: "من خەڵکی ئادانام و یەکەمجارە سەردانی دەریاچەی باڵک دەکەم. لای ئێمە زستان وەک ئێرە سارد نییە. یەکەم جارە لە ژیانمدا دەریاچەیەکی بەستوو ببینم. سروشت و دیمەنی ئێرە زۆر جوانە".