شڤان پەروەر لەبارەی رۆڵی ئافرەت و پێشمەرگەوە دەدوێت

ئەمڕۆ بەبۆنەی رۆژی جیھانی ئافرەتان ھۆنەرمەندی بەناوبانگی کورد شڤان پەروەر و کوڕی پێشەوا قازی محەمەد، عەلی قازی سەردانی سەنگەرەکانی پێشمەرگەیان کرد و لەو سەردانەشدا لەلایەن ھێزی کچانی رۆژ و فەرماندەکانی ئەو ناوچەیە لە بەنداوی مووسڵ پێشوازییان لێ کرا.

لەو سەردانەدا پێشمەرگەکانی ژن گورانییەکانی شڤان پەروەریان دەگوت و گوڵی سووریان پێشکەشی ئەو ھونەرمەندە کرد.

ھونەرمەند شڤان پەروەر لە لێدوانێکدا بۆ ئاژانسی ئانادۆڵو گوتی: "ئەو رۆژە رۆژێکی پیرۆزە بۆ ژنانی ھەموو جیھان و بەتایبەتی ھەرێمی کوردستان. ژن دایکی ئێمەن، ئەوان خۆشەویستی ئێمەن و بەبێ ژن، پیاو بوونی نییە و ھەروەھا من ھیوادارم کە لە رۆژھەڵاتی ناوەڕاست ئاشتی و ئارامی دروست بێت و ئەگەر دەسەڵاتدارانی جیھان ژن بوایەتن ئەوە دونیایەکی خۆشمان دەبێت چونکە دڵی دایکەکانی ئێمە نەرمترن لە پیاوان".

ھەروەھا گوتی: "لە ھەرێمی کوردستانیش پێشمەرگەی ژن و پیاو پێکەوە خەباتی خۆیان پێش دەخەن و ئەوەش لە شەڕی داعش بۆ ھەموو لایەک ئاشکرا بووە کە لە یەک سەنگەردا شەڕ دەکەن".

شڤان پەروەر لەبارەی پرۆسەی ئاشتی لە تورکیا گوتی: "ئەو پرۆسەیە پێویستە بە دەستی ھەردوولایەن سەر لە نوێ دروست ببێت و تورک و کورد بە سەدان ساڵە پێکەوە دەژین و دەتوانن ئەو پرسەش دیسانەوە نوێ بکەنەوە".

شڤان پەروەر لە کاتی سەردانیکردنی پێشمەرگەکانی ژن بۆ ئامادەبووان لە کۆتاییدا گوتی: "ئەوکاتەی داعش ھێرشی بۆ سەر ھەرێمی کوردستان کرد من زۆر دڵگران بووم و رەخنەی توندم ئاراستەی بەرپرسانی ھەرێمی کوردستان کردەوە کە بۆ ئێمە خاوەنی ئەو ھەموو خەبات و تێکۆشانەین نەتوانین سەربازێکی ئاکادیمی و خاوەن تاکتیکمان ھەبێت کە بتوانێت بەرگری لە ئێمە و خاک بکات بۆ چەک و تەقەمەنی پێشمەرگە، باش نییە؟ بۆ کەلوپەل و تاکتیکی پێشمەرگە پێشکەوتوو نین؟ ئەوەش دەگەڕێتەوە سەر بەرپرسیارێتی ئەو بەپرسانەی کە خەریکی خانوو و پارەکۆکردنەوە بوون و ئاگایان لە ھێزی پێشمەرگە نەبوو بەڵام خۆشبەختانە سەرۆکی ھەرێمی کوردستان مەسعود بارزانی دوای ماندووبوونێکی زۆر کە خۆی وەک پێشمەرگە بەشداری لە شەڕی دژی داعش دەکرد توانی ئەو ھێزە یەک بخات و پێشمەرگە دیسانەوە لە سەر پێی خۆی راوەستێت".