کۆبوونەوەی نێچیرڤان بارزانی و سەلیم جبوری

ھەولێر ــ AA

سەرۆکی ھەرێمی کوردستان، نێچیرڤان بارزانی لە چوارچێوەی سەردانەکەی بۆ بەغدا، لەگەڵ سەرۆکی پارتی گردبوونەوەی مەدەنی بۆ چاکسازیی "عەمەل" سەلیم جبوری کۆبوویەوە.

نووسینگەی سەرۆکایەتی ھەرێمی کوردستانەوە بڵاویکردەوە کە ئەمڕۆ دووشەممە، نێچیرڤان بارزانی لە سێیەم رۆژی سەردانەکەی بۆ بەغدا لەگەڵ سەلیم جبوری کۆبووەتەوە.

دوێنێ یەکشەممە، سەرۆکی ھەرێمی کوردستان، نێچیرڤان بارزانی لە دووەم رۆژی سەردانەکەی بۆ بەغدا بە جیا لەگەڵ سەرۆکی رەوتی حیکمە، عەممار حەکیم و سەرۆکی بەرەی رزگاری و پەرەپێدان، ئوسامە نوجێفی و ئەمینداری گشتیی پرۆژەی نیشتمانیی عێراقی، جەمال زاری و سەرۆکی ھاوپەیمانیی دەوڵەتی یاسا، نوری مالیکی و سەرۆکی ھاوپەیمانی فەتح، ھادی عامری و سەرۆکی ھاوپەیمانیی نەسر، حەیدەر عەبادی و سەرۆکی دەستەی سیاسیی رەوتی سەدر، نەسار روبێعی کۆبوویەوە.

ماڵپەڕی فەرمی سەرۆکایەتی ھەرێمی کوردستان بڵاویکردبوویەوە کە لە کۆبوونەوەکاندا راشکاوانە و بە کراوەیی دۆخی سیاسیی و ئابووری و ئەمنیی عێراق و بەرەنگارییە جیاکانی بەردەم وڵات، پەیوەندییەکانی ھەولێرـبەغدا و گفتوگۆی نێوانیان بۆ چارەسەرکردنی کێشە ھەڵپەسێردراوەکان، مەترسییەکانی تیرۆر و ھەڕەشەکانی داعش، پەیوەندییەکانی عێراق و وڵاتانی ناوچەکە و جیھان، ھەڵبژاردنەکانی داھاتووی عێراق و دۆخی ناوچەکە بەگشتی، تاوتوێ کرابوون.