قوباد تاڵەبانی: "گرنگە وەبەرهێنەرانی تورکیا سەردانی سلێمانی بکەن"

جێگری سەرۆکوەزیرانی ھەرێمی کوردستان قوباد تاڵەبانی ڕایگەیاند بەلایانەوە گرنگە کە کۆمپانیاکان و وەبەرهێنەرانی تورکیا سەردانی سلێمانی بکەن و بەشدار بن لە ئاوەدانکردنەوەی شارەکەدا.

لە میانی کردنەوەی سەنتەری پێدانی ڤیزەی تورکیا، قوباد تاڵەبانی وەڵامی پرسیاری ڕۆژنامەوانانی دایەوە و لەبارەی پەیوەندییەکانی نێوان ھەولێر و بەغدا، گرنگی بەشداری کۆمپانیا و وەبەرهێنەرانی تورکیا لە ئاوەدانکردنەوەی سلێمانی و هەروەها قۆناغی "تورکیای بێ تیرۆر" دوا.

​​​​​​لەبارەی پەیوەندییەکان لەگڵ بەغدا، جێگری سەرۆکوەزیرانی ھەرێمی کوردستان، ڕایگەیاند کە دانوستانەکانیان لەگەڵ حکوومەتی عێراق بەردەوامە بۆ دەستەبەرکردنی شایستە داراییەکانی ھەرێمی کوردستان و چارەسەرکردنی پرسی سووتەمەنی.

گوتیشی: "شاندەکانی ھەرێمی کوردستان بەچڕی لەگەڵ وەزارەتی دارایی عێراق لە گفتوگۆدان بۆ دابینکردنی شایستە دەستوورییەکانی ھەرێمی کوردستان و چارەسەرکردنی بنەڕەتیی پرسی مووچە".

سەبارەت بە بەرەوپێشچوونەکانی شاری سلێمانی و گرنگی بوونی کۆمپانیا و وەبەرهێنەرانی تورک، قوباد تاڵەبانی ڕاگەیاند کە تیمێکی پسپۆڕ ڕاسپێردراوە بۆ ئامادەکردنی ماستەرپلانێکی نوێ بۆ شارەکە بە ئامانجی خێراکردنی پرۆسەی وەبەرھێنان و کەمکردنەوەی ڕۆتین. جەختیشی لەسەر گرنگیی ئامادەیی کۆمپانیا و وەبەرھێنەرانی تورکیا کردەوە بۆ بەشدارییان لە پرۆژەکانی ئاوەدانکردنەوەی شارەکەدا.

لەبارەی گرانبوونی نرخی بەنزینیش، قوباد تاڵەبانی ڕوونیکردەوە کە بابەتەکە بەستراوەتەوە بە ھاوسەنگیی خستنەڕوو و داواکاری و گوتیشی، لە ئێستاشدا ھەوڵەکانیان لەگەڵ بەغدا و بەرھەمھێنەرانی ناوخۆ چڕ کردووەتەوە بۆ زیاترکردنی بڕی سووتەمەنی تاوەکو نرخەکەی دابەزێت.

سەبارەت بە قۆناغی "تورکیای بێ تیرۆر"، جێگری سەرۆکوەزیرانی هەرێم جەختی لە پشتیوانی تەواوی ھەرێمی کوردستان کردەوە بۆ پرۆسەکە و ڕایگەیاند، "ئاشتی دەبێت ھەمیشە زاڵ بێت و ھەردوولا بە جدییەوە لە ھەنگاوەکان دەڕوانن".