پەیامی هاوخەمی سەرۆکی پێشووی ھەرێمی کوردستان بۆ کۆچی دوایی نەجمەدین کەریم

هەولێر - AA

سەرۆكی پێشووی هەرێمی کوردستان، مەسعود بارزانی، بۆ كۆچی دوایی پارێزگاری پێشووی کەرکووک، نەجمەدین كەریم پەیامێکی سەرەخۆشیی بڵاوکردەوە.

لە پەیامەکەی مەسعود بارزانی هاتووە: "بە داخێكی زۆرەوە هەواڵی كۆچی دوایی د. نەجمەدین كەریم ـم پێ گەییشت. بەم هەواڵە زۆر دڵتەنگ و خەمبار بووم".

سەرۆکی پێشووی هەرێمی کوردستان سەرەخۆشیی خۆی ئاراستەی بنەماڵە و كەسوكاری نەجمەدین كەریم کردووە و خۆی بە هاوبەشی خەمیان زانیووە.

لە کۆتایی پەیامەکەی مەسعود بارزانی هاتووە "لە خودای مەزن داواكارم خوالێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت".

پارێزگاری پێشووی کەرکووک و ئەندامی پێشووی مەکتەبی سیاسی یه‌كێتیی نیشتمانیی كوردستان، نەجمەدین عومەر کەریم دوای مانه‌وه‌ی چه‌ند رۆژێک له‌ یەکێک لە نه‌خۆشخانه‌کانی ئه‌مریكا، شه‌وی رابردوو به‌هۆی جه‌ڵته‌ی مێشكه‌وه‌ کۆچی دوایی کرد.