ھەولێر ــ AA

وەزیری دادی عێراق، خالید شوانی ڕایگەیاند کە یاسای بەپارێزگابوونی ھەڵەبجە لە ڕۆژنامەی فەرمی وەقائیع، بڵاوکرایەوە.

خالید شوانی لە ھەژماری خۆی لە تۆڕی کۆمەڵایەتی فەیسبووک نووسیوویەتی: "ئەمڕۆ دووشەممە، یاسای ژمارە ٧ی ئیستیحداسکردنی پارێزگای ھەڵەبجە لە وەقائیعی عێراقی بڵاوکرایەوە".

ڕاشیگەیاندووە: "لە ئەمڕۆوە یاسای بەپارێزگابوونی ھەڵەبجە دوای بڵاوکردنەوەی لە ڕۆژنامەی فەرمی وەقائیع، دەچێتە واری جێبەجێکردنەوە".

بەوەش بە فەرمی و یاسایی، ھەڵەبجە دەبێتە ١٩مین پارێزگای عێراق.

رۆژی ٢٥ی نیسانی ٢٠٢٥، لە دانیشتنی ئەنجوومەنی نوێنەرانی عێراقدا، یاسای بەپارێزگابوونی ھەڵەبجە پەسەند کرا.

دواتر لە ٢٩ی نیسانی ٢٠٢٥ سەرکۆماری عێراق، عەبدولـلەتیف رەشید یاسای بەپارێزگابوونی ھەڵەبجەی واژوو کرد.