مەسرور بارزانی پێشوازی لە باڵیۆز فاتح یڵدز کرد

ئیستانبوڵ - AA

سەرۆکی حکوومەتی ھەرێمی کوردستان، مەسرور بارزانی لە شاری ھەولێر پێشوازی لە باڵیۆزی تورکیا لە شاری بەغدا، فاتج یڵدز و شاندی یاوەری کرد.

بەپێی ئەو راگەیەندراوەی لە نووسینگەی سەرۆکی حکوومەتی ھەرێمی کوردستان، مەسرور بارزانی بڵاوکراوەتەوە، یڵدز و سەرکونسوڵی تورکیا لە شاری ھەولێر، ھاکان کاراچای ئەم سەردانەیان بەمەبەستی پیرۆزبایی لە ھەڵبژاردنی مەسرور بارزانی وەک سەرۆکی حکوومەتی ھەرێمی کوردستان ئەنجامداوە.

یڵدز لەمیانی سەردانەکەدا ھیوای سەرکەوتنی بۆ مەسرور بارزانی خواستووە و ئومێدەواری ئەوەش بووە کە کابینەی نوێی حکوومەت ببێتە سەرەتایەک بۆ گەلی ھەرێمی کوردستانی عێراق و ببێتە ھۆکارێک بۆ بەھێزتربوونی پەیوەندییەکانی ئەنقەرە و ھەولێر.

لەلایەکی دیکەش مەسرور بارزانی رایگەیاندووە کە ئەوان دەیانەوێ پەیوەندییەکان لەگەڵ تورکیا بە تایبەتی لە بواری بازرگانی بەردەوام بێت و بەھێزتر بێت.

مەسرور بارزانی راشیگەیاندووە کە زەمینەی گونجاو بۆ وەبەرھێنەرانی ناوخۆیی و بیانی ئامادە دەکەن.

قەبارەی بازرگانی نێوان عێراق و تورکیا لە ئێستادا ١٢ ملیار دۆلارە، بەڵام لایەنەکان ئامانجیان وایە ئەم بڕە بگەیەننە ٢٠ ملیار دۆلار.