کۆبوونەوەی مەسرور بارزانی و شاندی حکوومەتی عێراق

هەولێر - AA

کەمێک پێش ئێستا کۆبوونەوەی نێوان سەرۆکوەزیرانی ھەرێمی کوردستان، مەسرور بارزانی و شاندێکی باڵای حکوومەتی عێراق دەستیپێکرد.

شاندەکەی حکوومەتی عێراق پێکھاتووە لە وەزیری دارایی و جێگری سەرۆکوەزیران، فوئاد حوسێن، وەزیری نەوت و جێگری سەرۆکوەزیران بۆ کاروباری وزە سامر غەزبان، راوێژکاری ئاسایشی نیشتمانی فالح فەییاز و بەڕێوبەری نووسینگەی عادل عەبدولمەھدی سەرۆکوەزیرانی عێراق ئەبو جیھاد ئەلھاشمی.

لە کۆبوونەوەکەدا هەریەک لە جێگری سەرۆکوەزیرانی هەرێم قوباد تاڵەبانی، وەزیری ناوخۆ رێبەر ئەحمەد و وەزیری دارایی ئاوات شێخ جەناب بەشدارن.

درەنگانی شەوی رابردوو، شاندەکەی حکوومەتی عێراق گەیشتە فڕۆکەخانەی نێودەوڵەتی هەولێر و لە لایەن جێگری سەرۆکوەزیران قوباد تاڵەبانی پێشوازییان لێکرا.

بەپێی زانیارییەکان، تەوەری سەرەکی کۆبوونەوەکانی دوو لایەن لەسەر پرسەکانی نەوت، ئابووری، ئەمنی و ماددەی ١٤٠ دەبێت.

دوای دەستبەکاربوونی کابینەی نۆیەمی حکوومەتی ھەرێمی کوردستان، یەکەم وێستگەی سەردانی سەرۆکوەزیرانی هەرێم، مەسرور بارزانی لە ١٦-٧-٢٠١٩ بۆ بەغدا بوو و لەگەڵ ھەریەک لە سەرکۆمار بەرھەم ساڵح، سەرۆکوەزیران عادل عەبدولمەھدی و سەرۆکی ئەنجوومەنی نوێنەرانی عێراق محەمەد حەلبوسی کۆبوویەوە.