مەسرور بارزانی و نوێنەری تایبەتی سەرۆکی فەڕەنسا بۆ سووریا کۆبوونەوە

هه‌ولێر - AA
مەسرور بارزانی پشتیوانی و یارمەتییەکانی فەڕەنسا بۆ هەرێمی کوردستان بەرز ده‌نرخێنێت.
ئه‌مڕۆ پێنجشه‌ممه‌ له‌ هه‌ولێر، راسپێردراو بۆ پێكهێنانی كابینه‌ی نوێی حكوومه‌تی هه‌رێمی كوردستان پێشوازی کرد له‌ نوێنه‌ری تایبه‌تی سه‌رۆكی فه‌ڕه‌نسا بۆ سووریا و شاندی یاوه‌ری.
مەسرور بارزانی پشتیوانی و یارمەتییەکانی فەڕەنسای بۆ هەرێمی کوردستان بەرزنرخاند و تیشکی خستە سەر هەنگاوەکانی پێکھێنانی کابینەی نوێی حکوومەتی هەرێمی کوردستان و گفتوگۆکانی نێوان هەولێر و بەغدا بە ئاراستەی چارەسەرکردنی کێشە و پرسە هەڵواسراوەکان.
لە بەشێکی دیکەی دیدارەکەدا بیروڕا لەبارەی بارودۆخ و پەرەسەندنی رەوشی سووریا ئاڵوگۆڕ کرا و جەخت کرایەوە له‌سه‌ر پێویستیی هه‌ر چاره‌سه‌رێك كه‌ گەرەنتی مافی هەموو پێکهاتەکان بکات و تەواوی هێزە نیشتمانییەکان لە داڕشتنەوەی ئایندەی وڵاتەکە بەشدار بن.
نوێنەری تایبەتی سەرۆکی فەڕەنسا بۆ سووریا، فڕانسوا سینیمو وێڕای بە ئومێد خواستن به‌ سەرکەوتن بۆ مەسرور بارزانی لە سەرۆکایەتیکردنی کابینەی داهاتووی حکوومەتی هەرێمی کوردستان، دووپاتی لە درێژەدان و فراوانکردنی پەیوەندییەکانی نێوان هەردوولا کردەوە و رایگەیاند، وڵاتەکەی لە پشتیوانی و هاوکاری هەرێمی کوردستان بۆ پێشکەوتنی زیاتر بەردەوام دەبێت.