سلێمانی.. كەوتنەوەی ئاگر لە زبڵ و خاشاكی تانجەرۆ

سلێمانی ـ AA

ماوەی دوو رۆژە بەهۆی كەوتنەوەی ئاگر لە پاشماوەی زبڵ و خاشاكی سلێمانی كە لە ناوچەی تانجەرۆ لە خوارووی شارەكەیە، دوكەڵێكی زۆر ئاسمانی ناوچەكەی گرتووەتەوە و تائێستاش گڕ و دوكەڵی ئاگرەكە بەردەوامی هەیە.

لێپرسراوی بەشی راگەیاندن لە فەرمانگەی ژینگەی سلێمانی، سوبحان حسێن لەو بارەیەوە بۆ ئاژانسی ئانادۆڵو گوتی: "ئاگرەكە لە نێوەڕۆی رۆژی رابردووەوە كەوتووەتەوە و گڕو دوكەڵێكی چڕ ئاسمانی ناوچەكەی گرتووەتەوە و ژینگەی ئەو ناوچەیەی بەتەواوەتی پیس كردووە".

ئەو گوتی: "رۆژانە زیاتر لە هەزار تۆن خۆڵ و خاشاكی سلێمانی دەبرێتە ئەو ناوچەیە فڕێ‌ دەدرێت، بەشی زۆری ئەو زبڵەش پلاستیك و نایلۆن و سووتەمەنی زۆری تێدایە و جگە لە گڕ و دوكەڵەكەی، بۆنێكی ناخۆشی بەو ناوچەیەدا بڵاو كردووەتەوە و سەرچاوەی نەخۆشییە مەترسیدارەكانە بۆ دانیشتووانی تانجەرۆ و دەوروبەری".