ئەنجوومەنی نوێنەرانی عێراق پێشنیازەیاسای ئاسایشی خۆراک و گەشەپێدانی پەسەند کرد

ھەولێر-AA

ئەنجوومەنی نوێنەرانی عێراق، بەکۆی دەنگی ئەندامانی ئامادەبووی دانیشتنەکەی ئەمڕۆ، پێشنیازەیاسای پاڵپشتی لەناکاوی ئاسایشی خۆراک و گەشەپێدانی پەسەند کرد.

فەرمانگەی راگەیاندنی ئەنجوومەنی نوێنەرانی عێراق لە راگەیەندراوێکدا ئاماژەی بەوەداوە، لە دانیشتنەکەی ئەمڕۆی ئەنجوومەنی نوێنەراندا، پێشنیازەیاسای پاڵپشتی لەناکاوی ئاسایشی خۆراک و گەشەپێدان خراوەتە دەنگدانەوە.

بەپێی زانیارییەکان لە کۆی ٣٢٩ ئەندامی ئەنجوومەنی نوێنەران، ٢٧٣یان لە دانیشتنەکەی ئەمڕۆدا، ئامادەبوون.

پێشنیازەیاسای پاڵپشتی لەناکاوی ئاسایشی خۆراک و گەشەپێدان بە کۆی دەنگی ٢٧٣ ئەندامی ئامادەبووی دانیشتنەکەی ئەمڕۆ، پەسەندکراوە.

پێشنیازەیاسای پاڵپشتی لەناکاوی ئاسایشی خۆراک و گەشەپێدان لە ١٨ ماددە پێکھاتووە و لەلایەن لیژنەی دارایی لە ئەنجوومەنی نوێنەرانی عێراقەوە پێشکەش کراوە و لەوچوارچێوەی پێشنیازەیاساکەدا، ٢٥ تریلیۆن دینار بۆ وەزارتەکان تەرخان کراوە.