پارتی چاکسازی و پێشکەوتووی تورکمان یادی 11 ساڵەی دامەزراندنی کردەوە

لە شاری هەولێر پارتی چاکسازی و پێشکەوتووی تورکمان یادی 11ـمین ساڵەی دامەزراندنی کردەوە کە تێیدا بەرپرسانی حزبی و حکوومی ئامادەی مەراسیمەکە بوون.
لە دەستپێکی رێوڕەسمەکەدا عەبدولقادر بارزگان پێشوازی لە میوانان کرد و لە دانیشتنێکیدا لەگەڵ سکرتێری مەکتەبی سیاسیی پارتی دیموکراتی کوردستان فازڵ میرانی، تیشکیان خستە سەر پێکەوەژیانی نەتەوەیی و جەختییان لە پتەوبوونی پەیوەندییەکانی نێوان هەردوولا کردەوە.
سەرۆکی فراکسیۆنی پارتی چاکسازی و پێشکەوتووی تورکمانیش بەم بۆنەیەوە جەخت لەسەر پەیوەندی و پێکەوەژیانی پێکهاتەکان دەکاتەوە و ئاماژە بەو پەیوەندییە مێژووییەی نێوان کورد و تورکمان دەکات.
سەرۆکی فڕاکسیۆنی پارتی چاکسازی و پێشکەوتووی تورکمان لە پەرلەمانی کودستان مونا قەهوەچی بەم بۆنەیەوە لە لێدوانێکی بۆ ئاژانسی ئانادۆڵو گوتی: "بەبۆنەی دامەزراندنی 11 ساڵەی پارتی چاکسازی و پێشکەوتووی تورکمان، پیرۆزبایی گەرم لە سەرجەم خەڵکی هەرێمی کوردستان دەکەین بەگشتیی و پێکهاتەی تورکمان بەتایبەتی و لە هەمانکاتدا دەستخۆشی لە هەنگاوەکانی سەرۆکی هەرێمی کوردستان دەکەین کە توانیویەتی سەقامگیری ئەم وڵاتە بپارێزێت".
سەرۆکی فڕاکسیۆنی پارتی چاکسازی و پێشکەوتووی تورکمان ئاماژە بەوەش دەکات کە پشتگیری هەر هەنگاوێک دەکەن کە لە بەرژەوەندی هەرێمی کوردستاندا بێت و لە هەمانکاتدا هیواخوازە کە پڕۆسەی ئاشتی لە تورکیا رابگەیەندرێت و لەمباریەوە مونا قەهوەچی گوتی: "هیوادارین بەزووترین کات پڕۆسەی ئاشتی لە نێوان حکوومەتی تورکیا و پەکەکە رابگەیەندرێت، چونکە لە بەرژەوەندی هەموو لایەنەکانی تورکیایە لەگەڵ ئەوەشدا ئێمە وەکو پێکهاتەی تورکمان، پشتگیری لە هەر هەڵوێستێک دەکەین کە لە بەرژەوەندی هەرێمی کوردستاندا بێت".

جێی ئاماژەیە پارتی چاکسازی و پێشکەوتووی تورکمان کە نوێنەرایەتی بەشێک لە تورکمانەکانی هەرێمی کوردستان دەکات و لە ساڵی 2005 دامەزراوە و عەبدولقادر بازرگان بە سەرۆکی ئەو حزبە هەڵبژێردرا و لە ئێستاشدا خاوەنی دوو کورسی پەرلەمانی کوردستانە.