وەزیری پێشمەرگە لەگەڵ نوێنەری هاوپەیمانان کۆبووەوە

هەولێر - AA

وەزیری پێشمەرگەی هەرێمی کوردستان، شۆڕش ئیسماعیل بە یاوەری بریکاری وەزارەت، سەربەست لەزگین لەگەڵ بەرپرسی هێزەکانی ئیتاڵیا لە عێراق و نوێنەری فەرماندەی گشتی هاوپەیمانان لە هەرێم، جەنەڕاڵ فۆرتێزا کۆبووەوە.

بەپێی راگەیەنراوێکی وەزارەتی پێشمەرگە، لە کۆبوونەوەکەدا تاوتوێی کۆمەڵێک بابەتی گرنگ و پەیوەست بە دۆخی ناوچەکە و هێزەکانی پێشمەرگەی کوردستان و هەنگاونان بۆ بنبڕکردنی جمجوڵی تیرۆریستانی داعش بە هاوکاری و هەماهەنگی زیاتری هێزەکانی هاوپەیمانان تاوتوێ کرا.

لەلای خۆیەوە وەزیری پێشمەرگە هەرێمی کوردستان سوپاسی پاڵپشتی هێزەکانی هاوپەیمانانی کرد و جەختی لەوە کردەوە کە هێزی پێشمەرگەی کوردستان گیانفیدایانە رێگری لە هەر جموجۆڵێکی تیرۆرستی دەکەن کە کاربکاتە سەر ئارامی و ئاسایشی هەرێمی کوردستان.