نێچیرڤان بارزانی و ھادی عامری پرسە ھاوبەشەکانی نێوان حکوومەتی فیدراڵیی و ھەرێمیان تاوتوێ کرد
aسەرۆکی ھەرێمی کوردستان-عێراق، نێچیرڤان بارزانی و ئەمینداری گشتیی ڕێکخراوی بەدر، ھادی عامری دوایین پێشھاتە سیاسییەکان و ڕەوشی گشتیی عێراق، ھەروەھا پرسە ھاوبەشەکانی نێوان حکوومەتی فیدراڵیی و ھەرێمیان، تاوتوێ کرد.
Arbil
ھەولێر ــ AA
سەرۆکی ھەرێمی کوردستان-عێراق، نێچیرڤان بارزانی و ئەمینداری گشتیی ڕێکخراوی بەدر، ھادی عامری دوایین پێشھاتە سیاسییەکان و ڕەوشی گشتیی عێراق، ھەروەھا پرسە ھاوبەشەکانی نێوان حکوومەتی فیدراڵیی و ھەرێمیان، تاوتوێ کرد.
سەرۆکایەتی ھەرێم لە ڕاگەیاندراوێکدا ئاماژەی بەوەداوە کە نێچیرڤان بارزانی پێشوازی کردووە لە ھادی عامری.
ڕاشیگەیاندووە کە لە دیدارێکدا، باس لە دوایین پێشھاتە سیاسییەکان و ڕەوشی گشتیی عێراق کراوە، ھەروەھا پرسە ھاوبەشەکانی نێوان حکوومەتی فیدراڵیی و ھەرێم و پەیوەندییەکانیان بە جۆرێک کە بەرژەوەندیی نیشتمانی دەستەبەر بکات، خراوەتە بەرباس.
باسی لەوەش کردووە کە لە میانی دیدارەکەدا، ھەردوولا جەختیان کردووەتەوە لە گرنگی بەھێزکردنی دیالۆگ و لێکگەیشتن لەنێوان ھەموو لایەنە عێراقییەکاندا و کاری ھاوبەش بۆ دەستەبەرکردنی سەقامگیریی وڵات و چارەسەرکردنی کێشە ھەڵپەسێردراوەکان بە ڕۆحی ھاوکاری و ھاوبەشیی نیشتمانی کردەوە، ھەروەھا ھەردوولا باسیان لە دۆخی وڵات و گرنگیی پارێزگاریکردن لە یەکڕیزیی نیشتمانی بۆ ڕووبەڕووبوونەوەی ئاڵنگارییە ناوچەیی و نێودەوڵەتییەکان کردووە.
ئەوەشی خستووەتەڕوو کە لە دیدارەکەدا، نێچیرڤان بارزانی گرنگیدانی ھەرێمی بۆ بەردەوامیی ھەماھەنگی و ھاوکاری لەگەڵ ھەموو ھێزە نیشتمانییەکان لە عێراق دووپات کردووەتەوە، ھەروەھا جەختی کردووەتەوە لەسەر گرنگی پشتگیریکردنی ھەوڵەکانی حکوومەتی فیدراڵیی لە بەدیھێنانی ئاسایش، سەقامگیری و بەھێزکردنی ھاوبەشیی نیشتمانی کە لە بەرژەوەندیی تەواوی وڵاتدایە.
