ھەولێر ــ AA

سەرۆکی ھەرێمی کوردستان-عێراق، نێچیرڤان بارزانی خۆشحاڵی خۆی نیشاندا سەبارەت بە پەسەندکردنی ھەمواری یاسای بوودجەی گشتیی فیدراڵیی لەلایەن ئەنجوومەنی نوێنەرانی عێراقەوە و ڕایگەیاند: "ئەمە ھەنگاوێکی دروست و ئومێدبەخشە و بە خێر و بەرژەوەندیی تەواوی عێراق بە ھەرێمی کوردستانیشەوە دەگەڕێتەوە".

نێچیرڤان بارزانی پەیامێکی لەبارەی پەسەندکردنی ھەمواری یاسای بوودجەی گشتیی فیدراڵیی لەلایەن ئەنجوومەنی نوێنەرانی عێراقەوە، بڵاوکردەوە و تیایدا ھاتووە: "پێشوازی لە دەنگدانی ئەنجوومەنی نوێنەران لەسەر ھەمواری یاسای بوودجەی گشتیی فیدراڵی دەکەین و دەستخۆشی لە ئەنجوومەنی نوێنەران و ھەموو ئەوانە دەکەین کە لە ئامادەکردن و پەسەندکردنیدا، بەشدار بوون".

ڕاشیگەیاندووە: "سوپاس و پێزانینی تایبەتمان بۆ سەرۆکوەزیران محەمەد شیاع سوودانی ھەیە کە ھەر لە سەرەتاوە دڵسۆزانە و بە گیانێکی نیشتمانی، لەگەڵ ئێمە ھاوکار و یارمەتیدەر بووە بۆ چارەسەرکردنی پرسەکانی پەیوەست بە بوودجە و مووچە و شایستە دارایییەکانی ھەرێمی کوردستان. دەستخۆشی لە شاندی دانوستانکار و لایەنە پەیوەندیدارەکانی حکوومەتی ھەرێمی کوردستان و حکوومەتی فیدراڵیی عێراق دەکەین".

ھەروەھا باسی لەوەش کردووە: "ئەمە ھەنگاوێکی دروست و ئومێدبەخشە و بە خێر و بەرژەوەندیی تەواوی عێراق بە ھەرێمی کوردستانیشەوە دەگەڕێتەوە. ئومێدەوارین ببێتە سەرەتای چارەسەرکردنی کێشەکانی دیکە و بە زووترین کات ھەواڵی دڵخۆشکەری چارەسەربوونی یەکجاریی پرسی مووچە و شایستە دارایییەکانی ھەرێمی کوردستانی بەدوادا بێت‌. دووپاتی دەکەینەوە کە لە ھەوڵدان بۆ چارەسەرکردنی تەواوی کێشەکان بە دیالۆگ و لێکگەیشتن بەردەوام دەبین".

دوێنێ یەکشەممە لە دانیشتنی ئاسایی ئەنجوومەنی نوێنەرانی عێراقدا، ھەمواری یاسای بوودجەی گشتی پەسەند کراو بە پێی ئەو ھەموارکردنەوەی یاساکە، ھەناردەکردنی نەوتی ھەرێم دەست پێ دەکاتەوە.