نه‌رمین عوسمان: "یه‌كێتی شه‌راكه‌تی راسته‌قینه‌ی ده‌وێت"

هه‌ولێر-AA

نه‌رمین عوسمان بۆ ئاژانسی ئانادۆڵۆ رایده‌گه‌یه‌نێت "له‌سه‌ركردایه‌تی یه‌كێتی باسی كاندیدمان بۆ سه‌رۆكایه‌تی هه‌رێم نه‌كراوه‌".

ئه‌ندامی سه‌ركردایه‌تیی یه‌كێتی نیشتمانی كوردستان نه‌رمین عوسمان باس له‌ كۆبوونه‌وه‌كانی حزبه‌كه‌ی و پارتی دیموكراتی له‌باره‌ی پێكهێنانی كابینه‌ی نۆیه‌می حكوومه‌تی هه‌رێمه‌وه‌ ده‌كات و له‌وباره‌یه‌وه‌ سه‌باره‌ت به‌ دوایین كۆبوونه‌وه‌كه‌ی یه‌كێتی و پارتی كه‌ هه‌فته‌ی رابردوو به‌ڕێوه‌چوو بۆ ئاژانسی ئانادۆڵو رایده‌گه‌یه‌نێت "خۆی له‌باره‌ی پۆسته‌كانه‌وه‌ له‌ دوایین كۆبوونه‌وه‌ی نێوان یه‌كێتی نیشتمانی كوردستان و پارتی دیموكراتی كوردستان باسی هیچ پۆستێك به‌دیاریكراوی نه‌كراوه‌، به‌ڵكو باسی شه‌راكه‌تی راسته‌قینه‌ كراوه‌، كه‌ ده‌ڵێین شه‌راكه‌تی راسته‌قینه‌ هه‌موو جومگه‌كانی حكوومه‌ت ده‌گرێته‌وه‌، ته‌نها شوێن و ناوه‌نده‌كانی بڕیار نییه‌، به‌ڵكو له‌ هه‌موو جومگه‌كانی حكوومه‌ت ده‌بێت پێكه‌وه‌ كاربكه‌ین، هه‌روه‌ها جه‌خت له‌سه‌ر ئه‌وه‌ش كراوه‌ته‌وه‌ كه‌ بێ ئه‌و دوو لایه‌نه‌ حكوومه‌ت ناتوانێت به‌باشی به‌ڕێوه‌ناچێت، ئێمه‌ ویستوومانه‌ یه‌كتر بسڕینه‌وه‌ زه‌ره‌ره‌مان كردووه‌ و كه‌سمان قازانجمان نه‌كردووه‌، به‌ پێچه‌وانه‌وه‌ میلله‌ت زه‌ره‌ری كردووه‌ و خه‌ڵكێكی زۆر تیاچوون، بۆیه‌ كه‌سمان ناتوانێن كه‌سمان بسڕینه‌وه‌، بۆیه‌ ده‌بێت واقیعبینانه‌ بتوانیین به‌یه‌كه‌وه‌ حكوومه‌تێكی كارا دروست بكه‌ین كه‌ له‌ خزمه‌تی هاووڵاتییاندا بێت، و ئه‌و گرفتانه‌ی له‌نێوان ئێمه‌ و حكوومه‌تی ناوه‌ندیش هه‌یه‌ بتوانیین به‌یه‌كه‌وه‌ چاره‌سه‌ر بكه‌ین".

سه‌باره‌ت به‌ ورده‌كاریی كۆبوونه‌وه‌كه‌ی هه‌فته‌ی رابردووی نێوان یه‌كێتی و پارتی، نەرمین عوسمان ده‌ڵێت "به‌ده‌ر له‌و چوار خاڵه‌ی كه‌ هه‌ردوو لا یه‌كێتی نیشتمانی كوردستان و پارتی كوردستان جه‌ختییان له‌سه‌ر كردووه‌ته‌وه‌ خاڵێكی دیكه‌ نییه‌ باس كرابێت له‌ ده‌ره‌وه‌ی ئه‌و بازنه‌یه‌، خۆی كه‌ ده‌ڵێین شه‌راكه‌تی راسته‌قینه‌ هه‌بێت و هه‌موو ئه‌و لێژنانه‌ی دروست ده‌كرێن له‌سه‌ر خاڵانه‌دا بێت حه‌تمه‌ن پۆسته‌كانیشی تێدایه‌، به‌ڵام پۆسته‌كان به‌ ناو ناوییان نه‌هێنراوه‌".

له‌ پرسیارێكی ئاژانسی ئانادۆڵو له‌مه‌ڕ ئه‌وه‌ی بۆچی هه‌میشه‌ یه‌كێتی خۆی به‌ ستەملێکراو ده‌زانێت و خۆی به‌ شه‌ریكی راسته‌قینه‌ نه‌بینیوه‌، نه‌رمین عوسمان روونی ده‌كاته‌وه‌ كه‌ مه‌به‌ستییان له‌ شه‌راكه‌تی راسته‌قینه‌ چییه‌ و ده‌ڵێت شه‌راكه‌تی راسته‌قینه‌، "خۆی شه‌راكه‌تی راسته‌قینه‌ له‌ حوكمڕانی ئه‌وه‌یه‌ ئاگاداری هه‌موو شته‌كان بیت، ئاگاداری ورد و درشتی دارایی حكوومه‌تی بێت، ئاگاداری ئه‌و په‌یوه‌ندییانه‌ بیت كه‌ له‌گه‌ڵ وڵاتاندا ده‌به‌سترێت و هه‌ن، ئاگاداری گفتوگۆكان بیت، ئه‌مه‌ شه‌راكه‌تی راسته‌قینه‌یه‌، شه‌راكه‌تی راسته‌قینه‌ ته‌نها وه‌رگرتنی پۆست نییه‌، ره‌نگه‌ له‌ زۆر شتدا ئاگاداری یه‌كتری بووبێتین، به‌ڵام هێشتا به‌پێی پێویست نه‌بووه‌، بۆیه‌ جه‌خت له‌سه‌ر شه‌راكه‌تی راسته‌قینه‌ ده‌كه‌ینه‌وه‌".

سه‌باره‌ت به‌ ده‌نگۆی پێشنیازێكی رێژه‌ی 60 به‌ 40 ی پۆسته‌كانی نێوانیان بۆ یه‌كێتی و پارتی و ره‌تكردنه‌وه‌ی ئه‌م پێشنیازه‌ ئه‌و به‌رپرسه‌ی یه‌كێتی نیشتمانی كوردستان ده‌ڵێت "ئاگادارنییم، كه‌ له‌ ناو كۆبوونه‌وه‌ش نه‌بووم ناتوانم ورده‌كاریی كۆبوونه‌وه‌كه‌ باس بكه‌م، به‌ڵام ئه‌وه‌ی ئاگادارم و له‌ راگه‌یاندنیشدا باسكراوه‌ و گفتوگۆم له‌گه‌ڵ هه‌ندێك براده‌ری به‌شداری نێو كۆبوونه‌وه‌كه‌ ئه‌وه‌ی هه‌یه‌ به‌ده‌ر له‌ چوار خاڵه‌ ئه‌وه‌ی باسكراوه‌ له‌نێو ئه‌و چوار خاڵه‌دایه‌ و شتێك له‌ ده‌ره‌وه‌ی ئه‌و چوار خاڵه‌ نه‌بووه‌".

له‌كۆتایی قسه‌كانیدا نه‌رمین عوسمان سه‌باره‌ت به‌ دیاریكردنی كاندیدانی حزبه‌كه‌ی بۆ ئه‌و پۆستانه‌ی له‌ كابینه‌ی نۆیه‌مدا به‌رییان ده‌كه‌وێت بۆ ئانادۆڵو رایده‌گه‌یه‌نێت، "هه‌ر كاتێك زانیمان ئه‌و پۆستانه‌ی ئیسحتیحقاقمانن و هی یه‌كێتی نیشتمانی كوردستانن هه‌ر ئه‌و رۆژه‌ كاندیده‌كان راده‌گه‌یه‌نیین".

سه‌باره‌ت به‌ كاندیدی یه‌كێتی بۆ پۆستی سه‌رۆكایه‌تی هه‌رێم كه‌ ئه‌و حزبه‌ دیاریی ده‌كات یان كاندیدی نابێت، ناوبراو روونی كرده‌وه‌ كه‌ هێشتا باسی ئه‌و پرسه‌ له‌نێو حزبه‌كه‌یدا نه‌كراوه‌ و له‌ كۆبوونه‌وه‌ی سه‌ركردایه‌تیشیدا ئه‌و باسه‌ نه‌خراوه‌ته‌ روو.