مەسعود بارزانی پێشوازی لە ئەمیری كۆمەڵی ئیسلامی دەکات

هەولێر - AA

سەرۆكی پێشووی هەرێمی کوردستان، مەسعود بارزانی پێشوازی لە ئەمیری كۆمەڵی ئیسلامی کوردستان، عەلی باپیر و شاندێكی یاوەری كرد.

ماڵپەڕی فەرمی مەسعود بارزانی بڵاوی کردووەتەوە، لە دیدارەكەدا، بارودۆخی سیاسیی و دوا پێشهاتەكانی هەرێمی كوردستان و عێراق و ناوچەكە تاوتوێ كرا.

هەر لەو دانیشتنەدا جەخت لە پێویستی هەماهەنگیی لایەنە كوردستانییەكان لەسەر بەرژەوەندییە باڵاكانی كوردستان و خاڵە هاوبەشەكانی نێوانیان و بەدیهێنانی بەكڕیزیی نیشتیمانی كرایەوە.

لە بەشێكی دیکەی ئەو كۆبوونەوەیەدا هەردوولا لەسەر پێویستیی یەكوتاری و هەماهەنگیی فڕاكسیۆنە كوردستانییەكان لە بەغدا هاوڕا بوون.

پەیوەندییەكانی نێوان هەردوولا، تەوەرێكی دیکەی ئەو دیدارە بووە.