مەسعود بارزانی: "هیوادارم ساڵی ٢٠٢١ ساڵی كۆتاییهاتنی پەتا و نەخۆشی و گرفتەكان بێت"

هەولێر - AA

سەرۆکی پێشووی هەرێمی کوردستان، مەسعود بارزانی ئاواتەخوازە ساڵی ٢٠٢١، ساڵی كۆتاییهاتنی پەتا و نەخۆشی و گرفتەكان بێت و ئاشتی و ئاسوودەیی بۆ هەموو هاووڵاتییانی كوردستان و عێراق و گشت ناوچەكە بێتە دی.

مەسعود بارزانی پەیامێکی پیرۆزبایی بەبۆنەی ساڵی نوێی زایینی بڵاوکردەوە.

دەقی پەیامەکەی مەسعود بارزانی:

بەناوی خودای بەخشندە و میهرەبان

بەبۆنەی سەری ساڵی نوێی زایینییەوە، پیرۆزبایی لە هاووڵاتیانی خۆشەویستی كوردستان و خانەوادەی شەهیدان و پێشمەرگە قارەمانەكان دەكەم و، هیوای خێر و خۆشی بۆ هەموو لایەك دەخوازم.

هیوادارم ساڵی ٢٠٢١ ساڵی كۆتاییهاتنی پەتا و نەخۆشی و گرفتەكان بێت و ئاشتی و ئاسوودەیی بۆ هەموو هاووڵاتیانی كوردستان و عێراق و گشت ناوچەكەمان بێتە دی.