بەڕێژەی لەسەدا ٤٣ ژمارەی سزادراوی ژن و نەوجەوانان كەمیكردووە

سلێمانی-AA

بەڕێوەبەرایەتی چاكسازیی ژنان و منداڵانی سلێمانی، ئاماری ساڵی ٢٠٢٠ی بڵاوكردەوە و تیایدا ئاماژە بەوەکراوە کە ٣٤٥ نەوجەوانی راگیراو، دانراو و سزادراوی ژنیان لە ساڵی٢٠٢٠دا بۆ رەوانەكراوە و لەو ژمارەیەش ٣٠١یان لە رەگەزی نێر بوون و ٤٤یشیان لە رەگەزی مێ بوون.

بەڕێوەبەرایەتی چاكسازیی ژنان و منداڵانی سلێمانی لە کۆنگرەیەکی رۆژنامەوانییدا ئاشكرایكردووە کە بەڕێژەی لەسەدا ٧٤ی سزادراوەكان بە سزای سووك سزادراون و لەسەدا ٢٦یشیان سزای قورسیان هەیە.

باسی لەوەشکرد کە ٣٤٥ كەس لە سزادراوەكان دانیشتووی هەرێمی كوردستان بوون، ٢١یان لە نەتەوەی عەرەب لە عێراق، چواریان ئێرانی بوون، سێیان هاووڵاتی سووریا بوون و كەسێكیشیان ئەفریقایی بووە.

لە بەشێکی تری ئامارەکەدا ئاماژە بە راگیڕاوەکانی ئەمساڵ بەراورد بە ساڵی رابردوو کراوە و تیایدا هاتووە کە ٥٣٣ راگیراویان بۆ هاتووە، ئەمەش دەریدەخات بەڕێژەی لەسەدا ٤٣ ژمارەی سزادراوی ژن و نەوجەوانان كەمیكردووە.