مه‌سعود بارزانی و شاندێكی هودا-پار كۆبوونه‌وه‌

هه‌ولێر - AA
لە دیدارەكەدا شاندی میوان سوپاسی سه‌رۆكی پارتی دیموكراتی كوردستان، مه‌سعود بارزانی-یان كرد بۆ رەخساندنی دیدارەكە و پێزانینیان بۆ خەبات و ماندووبوونی هەبوو لە بەرگریكردن و هەوڵدانی بۆ مافەكانی گەلی كوردستان.

به‌پێی راگه‌یه‌ندراوێكی نووسینگه‌ی سه‌رۆكی پارتی دیموكراتی كوردستان، مه‌سعود بارزانی ئه‌مڕۆ دیدارێك له‌ نێوان بارزانی و شاندی هودا-پار له‌ هاوینه‌هه‌واری پیرمام به‌ڕێوه‌چوو.

لە دیدارەکەدا به‌پێی راگه‌یه‌ندراوه‌كه‌ بارودۆخی سیاسیی توركیا و باروگوزەرانی كورد لەو وڵاتە، هەروەها دوا پێشهاتە سیاسییەكانی ناوچەكە و جیهان تاوتوێ كرا و شاندی میوان كورتەیەكیان لە كاروچالاكی و ئامانجە سیاسییەكانی حزبەكەیان بۆ سه‌رۆكی پارتی دیموكراتی كوردستان، مه‌سعود بارزانی خستەڕوو.

لە بەشێكی دیكەی كۆبوونەوەكەدا جەخت لە خەباتی سیاسی و ئاشتیانەی گەلی كورد بۆ مسۆگەركردنی مافەكانی كرایەوە و هەردوولایش لەسەر پەرەپێدانی پەیوەندییەكانی نێوانیان هاوڕا بوون.