بارزانی و مه‌كگۆرك باسی سووریا و عێراق ده‌كه‌ن

هه‌ولێر - AA
به‌پێی هه‌واڵێكی ماڵپه‌ری تایبه‌ت به‌ مه‌سعود بارزانی، مه‌كگۆرك و بارزانی باسیان له‌ سووریا و بارودۆخی ئه‌و وڵاته‌ و ستراتیجییه‌تی ئه‌مریكا له‌باره‌ی سووریاوه‌ كردووه‌، له‌گه‌ڵ باسكردنی ره‌وشی عێراق.

شانده‌كه‌ی یاوەری مه‌كگۆرك بریتی بوون له‌ باڵیۆزی ئه‌مریكا له‌ عێراق، دۆگڵاس سیلیمان و راوێژكاری تایبه‌تی نێرده‌ی تایبه‌تی سه‌رۆكی ئه‌مریكا بۆ هاوپه‌یمانی نێوده‌وڵه‌تی شه‌ڕی دژ به‌ داعش، ویلیه‌م رێبوك و كۆنسولی گشتی ئه‌مریكا له‌ هه‌ولێر، ستیڤ ڤاگین.

هه‌ردوو لا له‌و دیداره‌دا باسی بارودۆخی سووریایان كردووه‌ له‌گه‌ڵ دوایین پێشهاته‌كانی ئەو وڵاتە، شاندی میوان دوایین گۆڕانكارییه‌كانی سیاسی و ئه‌منیی سووریا و بارودۆخی مه‌یدانی شه‌ڕی دژبه‌ داعش له‌ سووریایان باسكردووه‌ له‌ پاڵ خستنه‌ڕووی ستراتیجیەتی وڵاته‌كه‌یان له‌باره‌ی سووریا.

به‌پێی هه‌مان سەرچاوە مه‌سعود بارزانی "نیگه‌رانیی خۆی ده‌ربڕیوه‌ له‌ ئاینده‌ی گه‌لی كورد له‌ سووریا، بۆچوون و ئامۆژگاریی خۆشی له‌باره‌ی چۆنییه‌تی چاره‌سه‌ركردنی كێشه‌كان و ته‌حه‌ددیاتی به‌رده‌م گه‌لی كورد له‌ سووریا" شیكردووه‌ته‌وه‌.

هاوكات له‌ كۆبوونه‌وه‌كه‌دا بارودۆخی سیاسیی عێراق و ناوچه‌كه‌ و هاوكێشه‌كانی نێو پڕۆسه‌ی سیاسی عێراق و هه‌نگاوه‌كانی ته‌واوكردنی پێكهاته‌ی حكوومه‌تی نوێی عێراقیش باسكراون، هه‌ر له‌ كۆبوونه‌وه‌کەدا سه‌ردانه‌كه‌ی ئه‌مدواییه‌ی بارزانی بۆ به‌غدا و ده‌رئه‌نجامه‌كانی و سه‌ردانی وه‌زیری وزه‌ی ئه‌مریكا بۆ عێراق و هه‌رێمی كوردستانیش قسه‌وباسیان له‌باره‌وه‌ كراوه‌.