بارزانی سەردانی بەلجیکا دەکات

هه‌ولێر-AA
بارزانی له‌ برۆكسل جه‌خت له‌سه‌ر به‌ڕێوه‌چوونی ئاشتییانه‌ی پڕۆسه‌ی گشتپرسی دوور له‌ توندوتیژی ده‌كاته‌وه‌.
راوێژكاری راگه‌یاندن له‌ نووسینگه‌ی سه‌رۆكی هه‌رێمی كوردستان مه‌سعود بارزانی، کیفاح شنگالی له‌ لێدوانێكدا بۆ ئاژانسی ئانادۆڵو رایگه‌یاند له‌سه‌ر داوایه‌كی فه‌رمی كه‌ له‌لایه‌ن یه‌كێتی ئه‌ورووپاوه‌ ئاراسته‌ی كراوه‌، ئه‌م هه‌فته‌یه‌ سه‌رۆكی هه‌رێمی کوردستان، مەسعود بارزانی سه‌ردانی برۆكسلی پایته‌ختی به‌لجیكا ده‌كات.
كیفاح شنگالی له‌ لێدوانێكدا بۆ ئانادۆڵو رایگه‌یاند "به‌داوه‌تی فه‌رمی یه‌كێتی ئه‌ورووپا سه‌رۆك بارزانی ئه‌م هه‌فته‌یه‌ سه‌ردانی به‌لجیكا ده‌كات و پێشبینی ده‌كرێت چه‌ند دۆسیه‌یه‌ك باس بكات كه‌ گرنگترینییان راپرسیی و مافی خه‌ڵكی كوردستانه‌ له‌سه‌ر دیاریكردنی چاره‌نووسی خۆی".
شنگالی له‌درێژه‌ی قسه‌كانیدا گوتیشی "له‌باره‌ی ریفراندۆمه‌وه‌ جه‌نابی سه‌رۆك باس له‌ ره‌هه‌نده‌كانی ریفراندۆم و هۆكاره‌كانی بۆ وڵاتانی یه‌كێتی ئه‌ورووپا ده‌كات، به‌تایبه‌ت ئه‌و رێگه‌ و شێوازه‌ی هه‌رێمی كوردستان له‌مباره‌یه‌وه‌ ده‌یگرێته‌ به‌ر پشت به‌ بنه‌ما دیموكراسییه‌ شارستانییه‌كان ده‌به‌ستێت كه‌ گشتپرسیی میللیه‌ و هه‌رێم سه‌رجه‌م رێكخراوه‌ نێوده‌وڵه‌تییه‌كان و رێكخراوه‌كانی مافی مرۆڤ و راگه‌یاندن و رۆژنامه‌نووسانیش بانگهێشت ده‌كات بۆ چاودێریكردنی ئه‌م پڕۆسه‌یه‌".
شنگالی هه‌روه‌ها تیشكی خسته‌ سه‌ر ئه‌وه‌ش كه‌ سه‌رۆكی هه‌رێمی كوردستان، مه‌سعود بارزانی پرسی دیكه‌ی په‌یوه‌ندیدار به‌ ریفراندۆم ده‌كات له‌وانه‌ وه‌كو ئاماژه‌ی بۆ كرد "هه‌روه‌ها بارزانی باس له‌ پلانی هه‌رێمی كوردستان ده‌كات سه‌باره‌ت به‌ وتوێژ و دیالۆگ له‌گه‌ڵ به‌غدا له‌مه‌ڕ ئه‌نجامه‌كانی راپرسی، چونكه‌ به‌غداش هاوبه‌شه‌ له‌گه‌ڵ ئێمه‌دا".
سه‌باره‌ت به‌ وڵاتانی یه‌كێتی ئه‌ورووپاش كیفاح شنگالی رایگه‌یاند "بارزانی جه‌خت له‌سه‌ر بانگهێشتنامه‌ی هه‌رێمی كوردستان بۆ سه‌رجه‌م ولاتانی یه‌كێتی ئه‌ورووپا و سه‌رجه‌م دۆستان ده‌كات بۆ پاڵپشتیكردنی ئه‌م پڕۆسه‌یه‌ و به‌تایبه‌ت دیالۆگ و وتوێژ له‌گه‌ڵ به‌غدا به‌مه‌به‌ستی گه‌یشتن به‌ ئه‌نجامه‌ خوازراوه‌كان له‌ راپرسییه‌كه‌ به‌شێوه‌یه‌كی ئاشتییانه‌ی شارستانی كه‌ دڵنیایی ژیانی هاوبه‌شی پێكهاته‌كان و دراوسێیه‌تی دروست له‌نێوان هه‌ردوولا بكات، هه‌روه‌ها خۆمان له‌سه‌رهه‌ڵدانی هه‌ر ململانێ یان ناكۆكی و كێشه‌یه‌كی ئاڵۆز له‌ ناوچه‌كه‌ به‌دووربگرین".
ئه‌و قسانه‌ی راوێژكاری راگه‌یاندن له‌ نووسینگه‌ی سه‌رۆكی هه‌رێمی كوردستان له‌كاتێكدایه‌ ئه‌مڕۆ لێژنه‌ی باڵای ریفراندۆم به‌ ئاماده‌بوونی بارزانی یه‌كه‌مین كۆبوونه‌وه‌ی خۆی سازكرد، رۆژی ٧ی حوزەیرانی ٢٠١٧ لە کۆبوونەوەیەکدا بە سەرپەرشتی سەرۆکی هەرێمی کوردستان، مەسعود بارزانی لەگەڵ سەرکردە و نوێنەری لایەنە سیاسییەکان بڕیاردرا رۆژی ٢٥ـی ئەیلوولی ٢٠١٧ پڕۆسەی ریفراندۆم لە هەرێمی کوردستان و ناوچەکانی دەرەوەی ئیدارەی هەریمی کوردستان ئەنجام بدرێت.