سەفین دزەیی.. چاکسازی لە سەرجەم سێکتەرەکان دەکرێت

کۆبونەوەی ئەمڕۆی ئەنجوومەنی وەزیران سەبارەت بە چاکسازی و مووچەی فەرمانبەران کۆتایی ھات و چەند بڕیارێک دەرکرا بەتایبەت سەبارەت بەدابەشکردنی مووچەی فەرمانبەران. بەگوێرەی بڕیارەکەی ئەمڕۆ کە لە ئەنجوومەنی وەزیران پەسەند کراوە حکوومەت ھەموو 30 رۆژ جارێک مووچە دابەش دەکات و ھەفتەی داھاتووش مووچەی مانگی یەک دەست پێ دەکات و چوار مووچەکەی تری ساڵی 2015 دەبێتە قەرز لای حکومەت.

گوتەبێژی حکوومەتی ھەرێمی کوردستان سەفین دزەیی لە کۆنگرەیەکی رۆژنامەوانیدا بەئامادەبوونی ھەریەکە لە رابەر صدیق بریکاری وەزیری دارایی و ئامانج رەحیم سکرتێری ئەنجوومەنی وەزیران رایگەیاند "حکوومەتی ھەرێم بەوپەڕی رێزەوە دەڕوانێتە خۆڕاگری پێشمەرگە و مووچەخۆران بۆ ئەم دۆخە سەختەی لە کوردستاندا ھەیە و بەنیگەرانییەکی زۆرەوە لە ئازارەرەکانتان تێ دەگات. روونە کۆمەڵێک ھۆکار لە دەرەوەی ئیدارەی حکوومەت رووبەڕووی ئەو قەیرانە سەختە بوونەتەوە ھەر لە بڕینی مووچە و شەڕی داعش و ھاتنی ئاوارەیەکی زۆر، دوایین ھۆکاریش کە کاریگەری زۆری ھەبوو دابەزینی نرخی نەوتە".

دزەیی هەروەها گوتیشی: "نکۆڵیش لەوە ناکەین ھەڵە و کەموکوڕی کارگێڕیش ھۆکاری بەشێک بوون لەو قەیرانانە بۆیە ماوەی یەک ساڵ کار دەکەین بۆ چارەسەریی ئەو کێشانە و دانانی پلانێک بۆ تێپەڕاندنی ئەم دۆخە. دوای بەدواداچوون لەگەڵ پسۆڕان و شارەزایان پلانێکی تۆکمە دانراوە لەگەڵ بەرنامەیەکی چاکسازی راستەقینە و ھەموو توانایەکیش دەگرینەبەر بۆ چارەسەریی ئەو قەیرانە و کرۆکی بەشێک لە بڕیارەکە کە پاشەکەوتی مووچەیە. جگە لە ھێزەکانی ئەمنی مووچەی بەشێک لە فەرمانبەران پاشەکەوت دەکرێ و بەگوێرەی زۆری و کەمی مووچە، تاوەکو مانگانە حکوومەت بەگوێرەی سیستەمی تازە مووچە دابەش بکات و مووچەکانی ساڵی رابردووش وەک قەرز دەبێ لای حکوومەت. بەھیچ شێوەیەکیش مووچەی کەس نابڕێت، بەڵکو چاکسازی لە سەرجەم سێکتەرەکانی تریش وەک کارەبا و ئاو و سەرجەم کەرتەکانی تر دەگرێتەوە. ئەم پلان و بەرنامانەش بەھاوکاری و پشتیوانی سەرجەم لایەنەکان تێدەپەڕێنین و ھەموو لایەکیش دڵنیا دەکەینەوە ئەم قۆناغە تێدەپەرێنین".

سکرتێری ئەنجوومەنی وەزیران ئامانج رەحیم، بڕیارەکانی خوێندنەوە و رایگەیاند: "پیادەکردنی بڕیاری پاشکەوتکردنی مووچە لە دەرماڵە و مووچەی فەرمانبەران جگە لە مووچەی ھێزەکانی ئەمنی، ئەو رێژەیەش دبێتە قەرز لەگەڵ مووچەکانی ساڵی رابردوو لە حیسابێکی وەزارەتی دارایی پاشکەوت دەکرێت. تا کاتی باش بوونی دۆخی دارایی و ئەم بڕیارەش لە سەرەتای ئەمساڵەوە جێبەجێ دەکرێت. سەرجەم پێشینەکانیش دوادەخرێ، ئەو کارمەندانەی ئوتومبێلی حکوومیان لایە پێویستە خۆیان خەرجیەکان لەئەستۆ بگرن بەپێچەوانەوە دەتوانن بیگەڕێنەوە بۆ حکوومەت، سێھەم پێکھێنانی لیژنەیەکی ھاوبەش بۆ سەرپەرشتیکردنی ژمارە حیسابی داھاتی نەوت لەگەڵ کۆمپانیایەکی باوەڕپێکراوە، واتە وەزارەتی سامانە سرووشتیەکان وردبینی بۆ داھاتی نەوت و گاز ناکات، چوارەم بڕیاریش گشت پرۆسەکانی نەوتی خاو جگە لە نەوتی بۆڕی لە رێگەی زیادکردنی ئاشکرا دەفرۆشێت و بەھیچ شێوەیەک نابێ راستەوخۆ نەوتەکە بدرێتە ھیچ بەڵێندەرێک".

ھەروەھا گوتیشی: "بڕیار دراوە پارێزگارەکان لەگەڵ ژووری بازرگانی و چاودێری بازرگانی بۆ دروستکردنی ھاوسەنگی لە نرخ و مووچەی فەرمانبەران و نەشتەرگەری و کرێی خانوو و کارەبای ئەھلی و زانکۆ و پەیمانگا بڕیارێکی تریش بەرجەستەکردنی لامەرکەزییەت لە بەرھەمە سووتەمەنییەکان بۆ پارێزگارەکان بدرێ تا وەکو بەگوێرەی پێداویستی بڕیار لەسەر ئەو کەرتە بدەن، سیستەمی ئەلیکترۆنی بۆ داتابەیسکردنی مووچەخۆران بۆ رەشکردنەوەی ناوی بندیواران".