سلێمانی.. کارکردنی لە 41 لەسەدی پڕۆژەكان بەردەوامە

سلێمانی - AA
لە ژووری بازرگانی و پیشەسازی سلێمانی، ئاماری سەرژمێری كارگەكانی سنووری پارێزگای سلێمانی راگەیەندرا كە چەند كارگەیە و چەندی لەكاردایە و چەندی راوەستاوە و چەندی داخراوە، لەگەڵ هۆكارەكانی راوەستانی كارگەكان و چارەسەر بۆ دەست پێكردنەوەیان.

بەڕێوەبەری گشتی پیشەسازی سلێمانی محەمەد جەبار لە كۆنگرەیەكی رۆژنامەوانیدا رایگەیاند: "ژمارەی پڕۆژەكانی وەبەرهێنان و بازرگانی و پیشەسازی لە سنووری پارێزگای سلێمانی و هەڵەبجە و ئیدارەكانی گەرمیان و راپەڕین دەگاتە چوار هەزار و 312 پڕۆژە".

گوتیشی: "لەو پڕۆژانە 41 لەسەدیان لەكاردان و بەردەوامن لەكاركردن، 15 لەسەدی ئەو پڕۆژانەش لەكاردا نین و وەستاون، هەروەها 18 لەسەدی پڕۆژەكان نەماون".

بەڕێوەبەری گشتی پیشەسازی سلێمانی ئاماژەی بەوەشكرد، ئەو پڕۆژانەی كە وەستاون لە پڕۆژە خزمەتگوزارییە كۆنەكانن لەوانەش ئاسنگەری، شووشتنی ئۆتۆمبێل، كارگەكانی كاشی و بلۆك كە بەشێكیان كەوتوونەتە نێو شوێنی نیشتەجێبوونەوە و بەو هۆیەوە داخراون.

محەمەد جەبار ئاماژەیشی بەوەکرد کە لە رێگای ئەو ئامارەوە دەتوانن لەمەودوا چۆن كار لەسەر پڕۆژەكان بكەن و زەوییان بۆ دابین بكەن، ئەو پڕۆژانەشی کە وەستاون دەتوانن بیانگۆڕن بۆ پڕۆژەی تر.

لە ماوەی سێ‌ ساڵی رابردودا و بەهۆی قەیرانی دارایی هەرێمی كوردستانەوە زیانی گەورە بەر پڕۆژە حكوومی و تایبەتەكان كەوت و ژمارەیەكی زۆری ئەو پڕۆژانە وەستاون.