"بڕیار لە چارەنووسی ھاوپەیمانی دیموکراسی و دادپەروەری دەدرێ"

سلێمانی ـ AA

ھاوپەیمانی بۆ دیموکراسی و دادپەروەری قەوارەیەکی سیاسییە لە ھەرێمی کوردستان و بە سەرۆکایەتی سەرکۆماری عێراق و جێگری سکرتێری گشتی یەکێتیی نیشتمانی کوردستان، بەرھەم ئەحمەد ساڵح پاش وازھێنانی لەحزبەکەی لە ساڵی ٢٠١٧ دامەزرا، سەرەتا وەک قەوارەیەکی سیاسی بۆ بەشداریکردن لە ھەڵبژاردنی پەرلەمانی کوردستان لە ١٧ی ئەیلوولی ساڵی ٢٠١٧ خۆی تۆمار کرد.

لە ڕۆژی ١٠ی کانوونی دووەمی ٢٠١٨ بە بەشداری ٦٥٠ ئەندام کۆنگرەی یەکەمی دامەزراندنی لە شاری سلێمانی ئەنجامدا و بەرھەم ئەحمەد ساڵح وەکو سەرۆکی ھاوپەیمانیەتییەکە ھەڵبژێردرا.

رۆژی ١٩ی ئەیلولی رابردوو ئەنجوومەنی سەرکردایەتی یەکێتیی نیشتمانی کوردستان بە فەرمی رایگەیاند، نامەیەکی بەرھەم ساڵح ـ یان بۆ پەیوەندی کردنەوەی بە یەکێتی بەدەست گەیشتووە و ئەنجومەنی سەرکردایەتی نامەکەی پەسندکردووە ، دواتریش وەک بەربژێری حزبەکە بۆ پۆستی سەرکۆماری عێراق دەستنیشانکرا.

لە ھەمان رۆژ و پاش راگەیەندنەکەی یەکێتیی نیشتمانی کوردستان، ھاوپەیمانی دیموکراسی و دادپەروەری لە راگەیەندراوێکدا دەستلەکارکێشانەوەی بەرھەم ساڵح لە سەرۆکایەتی ھاوپەیمانی راگەیاند.

لە راگەیێندراوەکەدا ئاماژە بەوەکرابوو، بەرھەم ساڵح و ژمارەیەک لە بەرپرسانی ھاوپەیمانی دەستلەکارکێشانەوەی خۆیان پێشکەشکردووە، دەستەی دامەزرێنەر و ئەنجوومەنی بەڕێوەبردنی ھاوپەیمانیش داواکارییەکەی پەسەندکردووە.

ئەندامی دەستەی دامەزرێنەری ھاوپەیمانی بۆ دیموکراسی و دادپەروەری و بەرپرسی دەزگای ھەڵبژاردنی ھاوپەیمانی، ئارام قادر لە لێدوانێکیدا بۆ ئاژانسی ئانادۆڵو لە دوای سێ ھەفتە لەو رووداوانە باس لە دۆخی ئێستای ھاوپەیمانی دوای دەستلەکارکێشانەوەی بەرپرسی یەکەمی ھاوپەیمانێتییەکە، بەرھەم ئەحمەد ساڵح، پلانی داھاتووی کاری ھاوپەیمانی، پەیوەندی دوو پەرلەمانتاری سەرکەوتووی ھاوپەیمانی بۆ پەرلەمانی عێراق بە ھاوپەیمانێتی، ھەروەھا پەیوەندی دامەزراوەی راگەیاندنی خەندان بە ھاوپەیمانێتییەوە دەکات.

ئارام قادر سەرەتا و لە بارەی دۆخی ھاوپەیمانی لە دوای دەستلەکارکێشانەوەی بەرھەم ئەحمەد ساڵح کرد و گوتی: "ھاوپەیمانی وەک بزاڤێکی کۆمەڵایەتی مەدەنی ھەر لە سەرەتای راگەیاندنییەوە ئەوەی دووپاتکردووەتەوە کە ئەم بزاڤە پەیوەست نییە بە تاکێک یان کەسێک و کەسایەتییەکەوە یان بە گرووپێکەوە، بەڵکو دیدگایەکی نیشتمانییە و بیروبۆچوونێکە کە کۆکەرەوەی رەنگ و دەنگە جیاوازەکانە، لەبەر ئەوە ھاوپەیمانی بە رۆشتنی دکتۆر بەرھەم کاروباری ناوەستێت و دەیەوێت بەشێوەیەکی کارا بەردەوام دەبێت لە کار و ئەرکی خۆیدا".

سەبارەت بە کاریگەری وازھێنانی بەرھەم ئەحمەد ساڵح کە کارەکتەری سەرەکی حزبەکە بوو، لەسەر کار و قورسایی ھاوپەیمانێتییەکە، ئارام قادر لە وەڵامدا گوتی: "ھەر ھاودیدێک لە ریزەکانی ھاوپەیمانی دوور بکەوێتەوە، ئێمە پێی نیگەرانین و زیانیشی دەبێت، بەڵام ھاوپەیمانی ھێز و توانایەکی ھەیە کە دەتوانێت قەرەبووی ئەو زیانە بکاتەوە و بەشێوەیەکی کارا و چالاکانەتر ھەوڵ بدات ئەو برینانە ساڕێژ بکات و بتوانێت لە داھاتوویەکی نزیکدا ھاوپەیمانی وەک ھێزێکی کاریگەر بخاتەڕوو".

ئارام قادر کە لە دوای دەستلەکارکێشانەوەی سەرۆکی ھاوپەیمانێتییەکە، ئەرکی گەورەی رێکخستنەوەی حزبەکەی کەوتووەتە ئەستۆ و رۆژانە لەنێو بەرپرسانی تری حزبەکەیدا زۆرترین سەرقاڵی و جوڵەی ھەیە باس لەوە دەکات، کە لەگەڵ بەرھەم ئەحمەد ساڵح ژمارەیەک لە ھەڤاڵەکانی کە پێشتر لەنێو یەکێتیی نیشتمانی کوردستاندا بوون گەڕاونەتەوە نێو یەکێتی، لەھەمانکاتدا بە ئومێدەوە باس لەوە دەکات کە بتوانن خۆیان رێکبخەنەوە و بەشێوەیەکی کاراتر ئیش و کارەکانیان ئەنجام بدەن.

ئەو کە خۆی پێشتر بەرپرسێکی باڵای بزووتنەوەی نەھزەی ئیسلامی، دوای یەکگرتنیان لەگەڵ بزووتنەوەی ئیسلامی کوردستان لە بزووتنەوەی یەکبونی ئیسلامی پۆستی باڵای ھەبووە، پاشان یەکێک بووە لە دەستەی دامەزرێنەرانی کۆمەڵی ئیسلامی کوردستان و بەرپرسی رێکخستنی حزبەکە و سەرۆکی فراکسیۆنی کۆمەڵ بووە لە پەرلەمانی کوردستان، ئاماژە دەکات بەوەی ھاوپەیمانێتییەکەیان "لە کادرانی ھەموو پارت و پاشخانە سیاسییە جیاوازەکانی تێدایە و کۆمەڵێک خەڵکی زۆری تێدایە کە پێشتر سەربەخۆ بون و تائێستا سیاسەتیان نەکردووە".

ئارام قادر ئەوەشی گوت: "لە ماوەیەکی نزیکدا کۆبوونەوەیەکی گشتی ئەنجام دەدەین و ھەمواری پەیڕەوی ناوخۆی ھاوپەیمانی دەکەین، لەکاتێکی نزیکیشدا ئیدارە و بەڕێوەبردنی ھاوپەیمانی دیاری دەکەین و دەتوانین لەو پێکھاتەیەی ھاوپەیمانی پێویستیەتی دیاری بکەین و وەک قەوارەیەکی سیاسی بەھێز لە ھەرێمی کوردستان چ لە رووی سیاسی و رێکخستنەوە بتوانێت لەسەر کارەکانی بەردەوام بێت".

لە ھەڵبژاردنی ١٢ی ئایاری رابردووی پەرلەمانی عێراق، ھاوپەیمانی بە لیستێکی سەربەخۆ بەشداریکرد و دوو کورسی پەرلەمانی بەدەستھێنا، دوای گەرانەوەی بەرھەم ساڵح بۆ ناو یەکێتی، قسە لەسەر چارەنووسی ئەو دوو پەرلەمانتارەش ھەیە کە ئایا چونەتە نێو لیستی یەکێتی یان وەک ھاوپەیمانی ماونەتەوە.

بەرپرسەکەی ھاوپەیمانی لەو بارەیەوە گوتی: "ئەو دەنگۆیانە دوورن لەراستییەوە و ئەو دوو پەرلەمانتارە پەرلەمانتاری ھاوپەیمانین و نوێنەری ھاودیدەکانی خۆیانن لە بەغدا و ئەو دەنگانەی ھێناویانە دەنگی ھاوپەیمانییە، بۆیە ئەو فراکسیۆنە فراکسیۆنی ھاوپەیمانییە".

ئارام قادر کە بەرپرسی دەزگای ھەڵبژاردنی ھاوپەیمانییە و حزبەکە بۆ ھەڵبژاردنی پەرلەمانی کوردستان بایکۆتی پڕۆسەکەی کرد باس لە ھۆکاری ئەو بڕیارە دەکات، "پێشتر ئێمە بەشێوەیەکی فەڕمی رامانگەیاند کە بەشداری ھەڵبژاردنی پەرلەمانی کوردستان ناکەین، لەبەر ئەوەی پێشبینییەکمان دەکرد کە پێشبینییەکی راست و تەواو دەرچوو بەوەی ساختەکارییەکی گەورە دەکرێت لە پڕۆسەکەدا، ئەو دەنگانەشی کە ھاتووە بۆ ھاوپەیمانی و ئەگەری بەدەستھێنانی کورسییەک ھەیە بریتییە لە ھاوسۆزی و پشتیوانی ھاووڵاتیان و دەنگدەرانی کوردستان بۆ ھاوپەیمانی".

پێشتر ھاوپەیمانی دیموکراسی و دادپەروەی خاوەنی دەزگایەکی راگەیاندنی گەورە بوو بەناوی خەندان کە خاوەندارێتییەکەی بۆ بەرھەم ئەحمەد ساڵح دەگەڕایەوە و کەناڵێکی ئاسمانی و رادیۆ و ماڵپەرێکی لە خۆگرتبوو، سەدان راگەیەندکار لەو کەناڵانەدا کاریان دەکرد.

بەڵام بە گوتەی بەرپرسەکەی ھاوپەیمانی دیموکراسی و دادپەروەری لە ئێستادا خەندان ھیچ پەیوەندییەکی بە ھاوپەیمانێتییەکە نەماوە، لە داھاتووشدا ھاوپەیمانێتییەکە خاوەنی پلان و بەرنامەی خۆی دەبێت تاوەکو دەزگایەکی راگەیاندنی کاریگەری خۆی ھەبێت لە ھەرێمی کوردستاندا.