غەززە ــ AA

وەزارەتی تەندروستیی فەڵەستین لە کەرتی غەززە ڕایگەیاند کە لەو کاتەی لە ١١ مانگی تشرینی یەکەمی ساڵی ٢٠٢٥، ڕێککەوتنی ئاگربەست لە غەززە چووەتە واری جێبەجێکردنەوە تا ئێستا، ٦٠٣ فەڵەستینی لەلایەن سوپای ئیسرائیلەوە کوژراون.

وەزارەتی تەندروستیی فەڵەستین لە کەرتی غەززە لە ڕاگەیاندراوێکدا، دوایین ئاماری لەباری ژمارەی قوربانیانی جینۆسایدی ئیسرائیل دژبە فەڵەستینییەکان لە کەرتی غەززە، بڵاوکردەوە.

بەپێی ڕاگەیاندراوەکە لە میانی ٢٤ کاتژمێری ڕابردوودا، دوو ھاووڵاتی دیکەی فەڵەستینی لە کەرتی غەززە لەلایەن سوپای ئیسرائیلەوە کوژراوە و ١١ی دیکەیش بریندارکراون.

باسی لەوەش کردووە کە لەو کاتەی لە ١١ی مانگی تشرینی یەکەمی ساڵی ٢٠٢٥، ڕێککەوتنی ئاگربەست لە غەززە چووەتە واری جێبەجێکردنەوە تا ئێستا، ٦٠٣ فەڵەستینی لەلایەن سوپای ئیسرائیلەوە کوژراون و ھەزار و ٦١٨ی دیکەش بریندارکراون.

ھەروەھا وەزارەتی تەندروستی فەڵەستین لە غەززە ڕاشیگەیاندووە، ژمارەی ئەو فەڵەستینییانەی کە لە ٧ی تشرینی یەکەمی ساڵی ٢٠٢٣وە تا ئێستا لە ئاکامی ھێرشەکانی ئیسرائیلدا بۆ سەر کەرتی غەززە کوژراون، بەرزبووەتەوە بۆ ٧٢ ھەزار و ٦٣ کەس و ژمارەی بریندارانیش، گەیشتووەتە ١٧١ ھەزار و ٧٢٦ کەس.