وەزیری دەرەوەی تورکیا سەردانێکی فەرمی بۆ ئەمریکا ئەنجام دەدات

ئەنقەرە - AA

وەزیری دەرەوەی تورکیا، مەولود چاوشئۆغڵو لە رۆژانی ١٧-٢٠ی کانوونی دووەمدا، سەردانێکی فەرمی بۆ ئەمریکا ئەنجام دەدات.

لەوبارەیەشەوە وەزارەتی دەرەوەی تورکیا راگەیەندراوێكی بڵاوکردووەتەوە و تیایدا ئەوە خراوەتەڕوو کە مەولود چاوشئۆغڵو لە میانی ئەم سەردانەیدا، رۆژی ١٨ی مانگ لە چوارچێوەی میکانیزمی ستراتیجیی نێوان تورکیا و ئەمریکا، کۆبوونەوەیەکی دووقۆڵی لەگەڵ هاوتا ئەمریکییەکەی، ئەنتۆنی بلینکن ئەنجام دەدات.

لە کۆبوونەوەکەدا سەرجەم رەهەندەکانی پەیوەندییەکانی نێوان هەردوو وڵات تاوتوێ دەکرێن و دەربارەی پرسە هەرێمییەکانیش، بیروڕا ئاڵوگۆڕ دەکرێت.

هەروەها پلان وایە وەزیری دەرەوەی تورکیا لە شارەکانی واشنتۆن و هیۆستن، لەگەڵ نوێنەری دامەزراوە هزرییەکان و رەوەندی تورکی لە ئەمریکا، کۆببێتەوە.

لەپاڵ ئەمەشدا چاوەڕوان دەکرێت چاوشئۆغڵو، بەشداری کردنەوەی نووسینگەیەکی نوێی کۆنسولخانەی تورکیا لە شاری هیۆستن بکات.

وەزیری دەرەوەی تورکیا لە دوارۆژی سەردانەکەیدا، دەچێتە نیویۆرک و لەگەڵ سەرۆکی کۆمەڵەی گشتیی نەتەوە یەکگرتووەکان، سابا کۆرۆسی کۆدەبێتەوە.

بەر لەم سەردانەش لە ١٧ی کانوونی دووەمدا لە واشنتۆن کۆبوونەوەیەکی راوێژکاریی بەسەرۆکایەتی جێگری وەزیری دەرەوەی تورکیا، سەدات ئۆناڵ و راوێژکاری سیاسیی وەزارەتی دەرەوەی ئەمریکا، ڤیکتۆریا نولاند بەڕێوەدەچێت.