میسر.. ژمارەی قوربانیانی تەقینەوەكە گەیشتە ٨٠ كەس

وەزارەتی تەندروستی میسر لە بەیاننامەیەكدا ئاماری قوربانیانی ئەو تەقینەوەیەی بڵاوكردەوە كە ئەمڕۆ یەكشەممە لە ریگەی بۆمبێكی چێنراو لەناو كڵێسای مار گۆرگیس لە شاری تەنتا سەربە پارێزگای غەربییە باكووری میسر روویدا.

وەزارەتی تەندروستی میسر رایگەیاندووە كە بەپێی دوایین ئامار، ژمارەی قوربانیانی تەقینەوەكە گەیشتووەتە ٢١ كوژراو و ٥٩ بریندار.

وەزارەتەكە ئاماژەی بەوەشداوە كە سەرجەم كوژراو و بریندارەكان گواستراونەتەوە بۆ نەخۆشخانەكانی شاری تەنتا و هەروەها سەرجەم نەخۆشخانەكانی پارێزگای غەربییە خراوەنەتە ئامادەباشییەوە.

هاوكات سەرچاوەیەكی ئەمنی میسری كە نەیویست ناوی خۆی ئاشكرا بكات بە ئاژانسی ئانادۆڵوی راگەیاند كە ژمارەی قوربانیانی ئەو تەقینەوەی كە لەناو كڵێسای مار گۆرگیس لە شاری تەنتا سەربە پارێزگای غەربییە باكووری میسر روویدا، گەیشتووەتە ٢٥ كوژراو و ٣٠ بریندار.

تا ئێستا هیچ لایەنێك بەرپرسیارێتی خۆی لە تەقینەوەكە رانەگەیاندووە.