قودس - AA
لە چوارچێوەی ڕێککەوتنی نێوان ئیسرائیل و حەماس، چوار سەربازی ژنی ئیسرائیلی لە لایەن لیواکانی عیزەددین قەسام باڵی سەربازیی حەماس لە كەرتی غەززە ئازاد و ڕادەستی خاچی سووری نێودەوڵەتی کران.
ئامادەکارییەکان بۆ ئەنجامدانی خوولێکی دیکەی ئاڵوگۆڕی دیلەکان لە نێوان ئیسرائیل و حەماس لە بەرەبەیانی ئەمڕۆوە دەستی پێکرد. دانیشتووانی غەززە لە بەرەبەیانەوە لە گۆڕەپانێکی ناوچەکە کۆببوونەوە کە دیلەکان ڕادەست دەکران.
لیواکانی عیزەددین قەسام باڵی سەربازیی حەماس لە گۆڕەپانەکەدا نووسراوەکانی تایبەت بە ئاڵۆگۆڕی دیلەکانیان واژوو کرد و ڕادەستی خاچی سووری نێودەوڵەتیان کردن.
دیلە ئیسرائیلییەکان جلوبەرگی سەربازییان لەبەر کرابوو و دوای گەیشتنیان بۆ شوێنەکە سڵاویان لەو خەڵک کرد کە لە شوێنەکە وەستابوون. پێکەنین و خۆشحاڵی سەربازی ئیسرائیلییەکان سەرنجی هەموو لایەکی بۆ لای خۆی ڕادەکێشا.
لە چوارچێوەی ڕێککەوتنی نێوان ئیسرائیل و حەماس، بڕیارە چوار سەربازی ژنی ئیسرائیلی ئازاد و لەبەرامبەردا ٢٠٠ فەڵەستینی لە بەندیخانەکان ئازاد بکرێن.
