فه‌ڕه‌نسا... خۆپیشاندانی ئێله‌گ زه‌رده‌كان به‌رده‌وامه‌

پاریس - AA

له‌ پاریسی پایته‌ختی فه‌ڕه‌نسا و شاره‌كانی دیكه‌ی ئه‌و وڵاته‌، ئێله‌گ زه‌رده‌كان سه‌رله‌نوێ رژانه‌وه‌ سه‌ر شه‌قامه‌كان و پڕۆتێستۆی سیاسه‌ته‌كانی سه‌ركۆمار ئیمانوێل ماكرۆن و حكوومه‌ت ده‌كه‌ن.

ئێله‌گ زه‌رده‌كان دژی سیاسه‌ته‌كانی سه‌ركۆمار ئیمانوێل ماكرۆن و حكوومه‌تی فه‌ڕه‌نسا، له‌ هه‌فته‌ی چواره‌می ناڕه‌زاییه‌كانیاندا له‌ژێر رێوشوێنی ئه‌منیی تونددا خۆپیشاندانیان ئه‌نجامدا.

خۆپیشانده‌ران له‌ شه‌قامی شامپس-ئیلیزه‌ی پاریس كۆبوونه‌وه‌ و ده‌ستیان به‌ رێپێوان كرد. له‌میانه‌ی رێپێوانه‌كه‌دا جارجاره‌ گرژی له‌نێوان خۆپیشانده‌ران و پۆلیسدا روویده‌دا. دوات ئێله‌گ زه‌رده‌كان چوونه‌ مه‌یدانی ئینڤالیدیس و له‌گه‌ڵ پۆلیسدا پێكهه‌ڵپژان. پۆلیس گازی فرمێسكڕێژی دژی ئه‌و خۆپیشانده‌رانه‌ به‌كارهێنا كه‌ به‌رد و شووشه‌یان تێده‌گرتن.

به‌ڕێوه‌به‌ری ئاسایشی پاریس رایگه‌یاند، له‌خۆپیشاندانه‌كانی پاریسدا 16 كه‌س ده‌ستبه‌سه‌ركراون.

به‌پێی ئه‌و داتایانه‌ی وه‌زاره‌تی ناوخۆی فه‌ڕه‌نسا بڵاویكردووه‌ته‌وه‌، سێ هه‌زار كه‌س به‌شداریی له‌خۆپیشاندانه‌كه‌ی پاریسی پایته‌خت و 10 هه‌زار و 200 كه‌سیش به‌شدارییان له‌ خۆپیشاندانه‌كانی سه‌رتاسه‌ری فه‌ڕه‌نسادا كردووه‌.