سەرکۆماری میسر و شاندێکی باڵای رووسیا دابینکردنی خۆراک و دانەوێڵەیان تاوتوێ کرد

قاهیرە – AA

سەرکۆماری میسر، عەبدولفەتاح سیسی لەگەڵ شاندێکی باڵای رووسیا کە سەردانی قاهیرەی کردبوو، چۆنێتی پتەوکردنی پەیوەندییەکانی نێوان هەردوو وڵات و زیادکردنی هەماهەنگییەکان لەبارەی دابینکردنی خۆراک و دانەوێڵەیان تاوتوێ کرد.

سەرۆکایەتی کۆماری میسر لە راگەیەندراوێکدا تیشکی خستووەتە سەر ئەوەی سەرکۆماری میسر، عەبدولفەتاح سیسی پێشوازی کردووە لە نوێنەری تایبەتی سەرۆکی رووسیا، ڤلادیمیر پوتین بۆ کاروباری رۆژهەڵاتی ناوەڕاست و وڵاتانی ئەفریقا، میخائیل بۆگدانۆڤ و وەزیری پیشەسازی و بازرگانیی رووسیا، دەنیس مانتورۆڤ.

لە میانی کۆبوونەوەکەدا، هەردوولا خۆشحاڵییان دەربڕی بە پەیوەندییە دێرینەکانی نێوان گەلی میسر و رووسیا و جەختیان لەسەر گرنگی پتەوترکردنی پەیوەندییەکانیش کردەوە لە بوارە جیاوازەکاندا.

سیسی و شاندە رووسییەکە، هەروەها لەبارەی دابینکردنی خۆراک و دانەوێڵەوە دوان.

کۆبوونەوەکە لە میانی ١٤ەمین کۆبوونەوەی لیژنەی هاوبەشیی هەماهەنگی تەکنیکیی، زانستیی، ئابووریی و بازرگانیی لەنێوان هەردوو وڵات ئەنجام درا.