سوپای ئیسرائیل چوار فەڵەستینی لە کەناری رۆژئاوا کوشت

قودس - AA

لە ئاکامی پەلاماری هێزەکانی سوپای ئیسرائیل بۆسەر چەندناوچەیەکی کەناری رۆژئاوای داگیرکراو، چوار فەڵەستینی کوژران و لانیکەم پێنجی دیکەش برینداربوون.

لە هەواڵێکدا کە لە رۆژنامەی هائارێتزدا بڵاوکراوەتەوە، ئاماژە بەوە کراوە کە لە میانی پەلاماری هێزەکانی سوپای ئیسرائیلدا بۆسەر پێنج ناوچەی جیاواز لە کەناری رۆژئاوای داگیرکراو، شەڕ و پێکدادان لەنێوان هێزەکانی سوپای ئیسرائیل و فەڵەستینیەکاندا دروست بووە.

لە هەواڵەکەدا کە بە پشت بەستن بە زانیاری سوپای ئیسرائیل بڵاوکراوەتەوە، باس لەوە کراوە کە لە ناوچەی بەیت عەنان سێ و لە ناوچەی کەفر بەرقین یەک، فەڵەستینی کوژراون.

لە کاتێکدا بانگەشەی ئەوە دەکرێت کە کوژراوەکان ئەندامی بزووتنەوەی حەماس بن، هێشتا بەرپرسانی فەڵەستینی هیچ راگەیەندراوێکیان سەبارەت بە رووداوەکە بڵاونەکردووەتەوە.