واشنتۆن ــ AA

سەرۆکی ئەمریکا، دۆناڵد ترەمپ ڕایگەیاند کە گەیشتوونەتە قۆناغی کۆتایی لە دانوستەکانی نێوان ڕووسیا و ئۆکراینا.

دۆناڵد ترەمپ بەر لە کۆبوونەوەی لەگەڵ سەرۆکی ئۆکراینا، ڤلۆدیمێر زێلێنسکی کە بڕیارە لە ویلایەتی فلۆریدا ئەنجام بدرێت بە ڕۆژنامەوانانی گوت: "گەیشتووین بە قۆناغی کۆتایی لە دانوستەکانی نێوان ڕووسیا و ئۆکراینا".

ئاماژەی بەوەشدا کە جەنگی نێوان ڕووسیا و ئۆکراینا یان کۆتایی پێ دێت یان تا ماوەیەکی درێژ بەردەوام دەبێت.

باسی لەوەش کرد کە گرەنتییەکی ئەمنی بەھێز بۆ ئۆکراینا دابین دەکرێت و وڵاتانی ئەورووپاش لەو پڕۆسەیەدا، بەشداری دەکەن.

ڕاشیگەیاند کە دوای کۆبوونەوەکەی لەگەڵ ڤلۆدیمێر زێلێنسکی، پەیوەندییەکی تەلەفۆنیی بۆ درێژەدان بە دانوستانەکان لەگەڵ سەرۆکی ڕووسیا، ڤلادیمیر پوتین ئەنجام دەدات.

ھەر لەوبارەیەوە سەرۆکی ئۆکراینا، ڤلۆدیمێر زێلێنسکی بەر لە کۆبوونەوەی لەگەڵ دۆناڵد ترەمپ لە ویلایەتی فلۆریدا لە لێدوانێکی ڕۆژنامەوانیدا ڕایگەیاند کە لە کۆبوونەوەکەدا، پلانە ٢٠ خاڵەکەی سەرۆکی ئەمریکا بۆ کۆتاییھێنان بە جەنگ تاوتوێ دەکەن.

گوتیشی: "ھیوادارم خاڵەکانی ناو پلانەکە، یارمەتیدەر بن بۆ بەدیھێنانی ئاشتی".