تورکیا هەڵکوتانە سەر مزگەوتی ئەقسای بەتوندی سەرکۆنە کرد

ئەنقەرە - AA

تورکیا هەڵکوتانە سەر مزگەوتی ئەقسا لەلایەن وەزیری ئاسایشی نەتەوەیی ئیسرائیل، ئیتەمار بن گڤیر و جوولەکەنیشینە رادیکاڵەکان، بە کردەوەی ئیستفزازیی وەسف کرد و بەتوندی سەرکۆنەی کرد.

وەزارەتی دەرەوەی تورکیا، راگەیەندراوێکی سەبارەت بە هەڵکوتانە سەر مزگەوتی ئەقسا لەلایەن وەزیری ئاسایشی نەتەوەیی ئیسرائیل بڵاوکردەوە.

لە راگەیەندراوەکەدا هاتووە: "بەتوندی هەڵکوتانە سەر مزگەوتی ئەقسا لەلایەن وەزیری ئاسایشی نەتەوەیی ئیسرائیل و جوولەکەنیشینە رادیکاڵەکان لەژێر پاسەوانی هێزە ئەمنییەکان، سەرکۆنە دەکەین".

لە راگەیەندراوەکەدا داوای ئەوە کراوە کە رێگە بەو کردەوە ئیستفزازییانە نەدرێت کە پیرۆزییەکان و پێگەی مێژوویی مزگەوتی ئەقسایان پێش دەکەن و هاتووە: "بانگهێشتی دەسەڵاتدارانی ئیسرائیل دەکەین کە رێوشوێنی پێویست بگرنەبەر بۆ رێگریکردن لە تەشەنەسەندنی زیاتری گرژییەکان".

بەیانیی ئەمڕۆ، وەزیری ئاسایشی نەتەوەیی ئیسرائیل، ئیتەمار بن گڤیر و جوولەکەنیشینە رادیکاڵەکان لەژێر پاسەوانی هێزە ئەمنییەکان لە دەرگای مەغاریبەی مزگەوتی ئەقساوە چووبوونە ناو حەرەمی شەریف.

وەزیری ئاسایشی نەتەوەیی ئیسرائیل، ئیتەمار بن گڤیر لە هەژماری تایبەتی خۆی لە تۆڕە کۆمەڵایەتییەکان رایگەیاندبوو: "ئەمە، گرنگترین شوێنە بۆ ئەوەی گەلی ئیسرائیل بۆی بگەڕێنەوە و سەروەری خۆمانی تیایدا نیشان بدەن".