ئەنقەرە - AA

وەزیری دەرەوەی ئێران، عەباس عێراقچی بە سکرتێری گشتیی نەتەوە یەکگرتووەکان، ئەنتۆنیۆ گۆتێرێسی ڕايگەیاند کە دۆخی گەرووی هورمز ئەنجامی ئەو جەنگەیە کە ئەمریکا و ئیسرائیل دژی ئێران هەڵیانگیرساندووە.

بەپێی ڕاگەیاندراوێکی وەزارەتی دەرەوەی ئێران، عێراقچی پەیوەندییەکی تەلەفۆنی لەگەڵ سکرتێری گشتیی نەتەوە یەکگرتووەکان گۆتێرێس ئەنجام داوە.

عێراقچی بە گۆتێرێسی ڕاگەیاندووە دەستدرێژی سەربازیی ئەمریکا و ئیسرائیل بۆ سەر ئێران، پێشێلکارییەکی توندی پەیماننامەی نەتەوە یەکگرتووەکان و بنەما سەرەکییەکانی یاسا نێودەوڵەتییەکانە. هاوکات بەرپرسیارێتیی نەتەوە یەکگرتووەکان و سکرتێری گشتیی وەبیرهێناوەتەوە بۆ ئیدانە کردنی ئەم دەستدرێژییە بە شێوەیەکی ڕوون، لەگەڵ لێپرسینەوە لە دەستدرێژکاران بەپێی بڕگەی حەوتی پەیماننامەی نەتەوە یەکگرتووەکان.

هەروەها عێراقچی ئاماژەی بەوە کردووە کە سەرچاوەی ناسەقامگیریی لە ناوچەکە و گەرووی هورمز ئەنجامی ئەو جەنگەیە ئەمریکا و ئیسرائیل دژی ئێران دەستیان پێکردووە.

گوتیشی: "دۆخی گەرووی هورمز ناتوانرێت بەبێ ڕەچاوکردنی دۆخی گشتیی ناوچەکە هەڵبسەنگێنرێت، چونکە پەککەوتنی چالاکییە دەریاییەکان لە گەرووی هورمز ئەنجامی ئەو جەنگەیە کە ئەمریکا و ڕژێمی زایۆنی سەپاندوویانە. هەر وڵاتێک یان دامەزراوەیەکی نێودەوڵەتی کە بایەخ بە ئاشتیی و ئاسایش دەدات، دەبێت بە بەرپرسیارێتییەوە و بەبێ هەڵوێستی سازشکارانە تاوانەکانی ئەم دوو ڕژێمە ئیدانە بکات و داوای کۆتاییهێنان بە دەستدرێژییە سەربازییەکانیان بۆ سەر نەتەوەی ئێران بکات".

لە بەرامبەردا سکرتێری گشتیی نەتەوە یەکگرتووەکان گۆتێرێس ڕاو بۆچوونەکانی خۆی دەربارەی ناوچەی کەنداوی بەسرە، ڕۆژئاوای ئاسیا و پرسی ئاسایشی دەریایی بە عێراقچی گەیاند.