کاروانێکی دیکەی ڤاکسینی فایزەر گەیشتە عێراق

ھەولێر ــ AA

کاروانێکی دیکەی ڤاکسینی کۆرۆنا لە جۆری فایزەر کە ٥٧١ ھەزار دۆزە، گەیشتە عێراق.

لەمبارەیەوە وەزارەتی تەندروستیی و ژینگەی عێراق لە راگەیەنراوێکدا ئاماژەی بەوەداوە کە ئەمڕۆ یەکشەممە، کاروانێکی دیکەی ڤاکسینی کۆرۆنا لە جۆری فایزەر، گەیشتووەتە عێراق کە ٥٧١ ھەزار دۆزە و ھاتووە:

"ڤاکسینەکان بەسەر سەرجەم بنکە و فەرمانگە تەندروستییەکانی پارێزگاکانی عێراق دابەش دەکرێن".

وەزارەتی تەندروستیی و ژینگەی عێراق لە راگەیەنراوەکەدا ھانی ھاووڵاتییانی داوە کە سەردانی بنکە و فەرمانگە تەندروستییەکان بکەن بۆ ئەوەی ڤاکسین وەربگرن، چونکە ئەوە یەکێکە لە رێگاکان بۆ بەرەنگاربوونەوەی ڤایرۆسی کۆرۆنا.

لە ١١ی مانگی نیسانی رابردوودا، یەکەم کاروانی ڤاکسینی فایزەر لە ئەمریکاوە گەیشتبووە عێراق.

تا ئێستا، یەک ملیۆن و ٧٠٩ ھەزار و ٧٩٣ کەس لە عێراق، دۆزی یەکەم و دووەمی ڤاکسینی کۆرۆنایان وەرگرتووە.