ئەمریکا.. رێگە بە بەکارهێنانی پشکنینی کۆرۆنا لە ماڵەوە دەدرێت

ئەنقەرە- AA

لە ئەمریکا رێگە بە بەکارهێنانی پشکنینێکی کۆرۆنا دەدرێت کە لە ماڵەوە بەکاردەهێندرێت و لە ماوەی ٣٠ خولەکدا ئەنجامەکە نیشان دەدات.

لە سەرەتادا بەشێوەیەکی سنووردار رێگە بە بەکارهێنانی پشکنینەکە دەدرێت و بە رەچەتە بە خەڵک دەدرێت.

بۆ ئەنجامدانی پشکنینەکە، کەمێک لە شلەی ناو لووتی کەسەکە وەردەگیردرێت و دەخرێتە ناو ئامێرەکەوە و دوای ٣٠ خولەک ئەنجامی پشکنینەکە لەسەر ئامێرەکە دەردەکەوێت.

پێشتر پشکنینەکان لەلایەن کارمەندانی تەندروستییەوە و لە تاقیگەکاندا ئەنجام دەدران، بەڵام لەئێستادا دەکرێت ئەو کەسانەی گومان دەکەن تووشی ڤایرۆسەکە بووبێتن، خۆیان لە ماڵەوە پشکنین بۆ خۆیان ئەنجام بدەن و بەخێرایی رێوشوێنی پێویست بۆ پاراستنی خۆیان و دەوروبەریان بگرنەبەر.

بەگوێرەی ئامارەکانی ماڵپەڕی"Worldometers"، تا ئێستا ١١ ملیۆن و ٦٩٥ هەزار و ٧١١ حاڵەتی توشبوون بە کۆرۆنا لە ئەمریکا تۆمارکراون و ٢٥٤ هەزار و ٢٥٥ کەسیش بەهۆی ڤایرۆسەکەوە گیانیان لەدەستداوە.