عێراق: "بەم نزیكانە دۆسیەی ئاو لەگەڵ توركیا یەكلایی دەكەینەوە"

هەولێر ــ AA

وەزیری سەرچاوەكانی ئاو لە حکوومەتی عێراق، مەهدی رەشید حەمدانی رایگەیاند كە لە ماوەیەكی نزیكدا، دۆسیەی ئاو لەگەڵ توركیا یەكلایی دەكەنەوە و گوتی: "بەردەوامین لە ئامادەكردنی رەشنووسی پرۆتۆكۆلێک بە ئامانجی دیاریكردنی پشكی ئاوی خۆمان لە رووباری دیجلە".

مەهدی رەشید حەمدانی لە لێدوانێكدا بۆ ئاژانسی هەواڵیی فەرمی عێراق گوتی: "دۆسیەی دانوستانەكان لەگەڵ وڵاتانی دراوسێی سەبارەت بە پشكی ئاوی عێراق، زیاتر لە ٣٥ ساڵە بەردەوامە و متمانەمان هەیە بەوەی بەم نزیكانە دۆسیەی ئاو لەگەڵ توركیا یەكلایی بكەینەوە".

راشیگەیاند كە عێراق و توركیا خواستی سیاسیی و راستەقینەیان هەیە بۆ یەكلاییكردنەوەی دۆسیەی ئاو و گوتی:

"بۆ ئەو مەبەستەش سەركۆماری توركیا، رەجەب تەیب ئەردۆغان نێردەی تایبەتی خۆی بە ئامانجی یەكلاییكردنەوەی دۆسیەی ئاو، ناردبووە عێراق، ئێستایش لای خۆمانەوە لە ئەنجوومەنی وەزیران بەردەوامین لە ئامادەكردنی رەشنووسی پرۆتۆكۆلێک بە ئامانجی دیاریكردنی پشكی ئاوی خۆمان لە رووباری دیجلە".