سەرکۆماری تورکیا ئەردۆغان: "شەوێک لە پڕ دەچینە رۆژهەڵاتی فورات"

ئەنقەرە - AA

سەرکۆماری تورکیا رەجەب تەیب ئەردۆغان لە بارەی ھەنگاوەکانی تورکیا لەبارەی رۆژھەڵاتی فورات دەلێت: "ھەموو ئەمانە بەیەکەوە ئەنجام بدەین چییە؟ شەوێک لە پڕ دەچینە ژوورەوە"

سەرکۆماری تورکیا، رەجەب تەیب ئەردۆغان لە وەرزی نوێی یاسادانانی پەرلەمانی تورکیا گوتارێکی پێشکەش کرد.

سەرکۆماری تورکیا، رەجەب تەیب ئەردۆغان رایگەیاند "تورکیا بە ھۆی ئارەزووی ئەو ھێزانەی حساباتیان ھەیە لە ناوچەکە، واز لە ئاسایشی خۆی و داھاتووی خوشک و براکانی ناھێنێت".

سەرکۆماری تورکیا، ئەردۆغان گوتی: "ھەست بەو ئاستەنگییە ئابووری، کۆمەڵایەتی و کولتووریانە دەکەین بە ھۆی نزیکەی سێ ملیۆن و ٦٥٠ ھەزار میوانمان لە سنورەکانماندا لە ئاکامی درێژەکێشانی کێشەکانی سووریا. دەشزانین جگە لە تورکیا ھیچ وڵاتێکی دیکە شانی نەداوەتە بەر ئەو ئەرکە کە ھێندە درێژە بکێشێت. لەگەڵ ئەوانەیشدا بیر لەوە ناکەینەوە تاھەتایە میوانداری ملیۆنەھا پەنابەر بکەین لەسەر خاکەکەمان".

سەرکۆماری تورکیا، رەجەب تەیب ئەردۆغان گوتیشی: ''ژمارەی ئەو پەنابەرە سووریانەی کە تا ئێستا گەڕاونەتەوە ئەو شوێنانەی ئارامیمان تیادا فەراھەم کراوە، گەیشتووەتە ٣٦٠ ھەزار. تاکە ھۆکاری بوونمان لە سووریا ئەو ھەڕەشانەیە کە دەکرێنە سەر سنوورەکانمان لە ھەمان کاتدا بوونی رێگرێک کە بەربەستبوو لە گەڕانەوەی ئەو سووریانەی لە وڵاتەکەماندان''.