ھەولێر ــ AA

ڕاوێژکاری ئاسایشی نەتەوەیی عێراق، قاسم ئەعرەجی بە پێویستی زانی کە چارەسەرێک بۆ کێشەی مووچەی مووچەخۆرانی ھەرێمی کوردستان-عێراق، بدۆزرێتەوە و جەختی لەوەش کردووە کە پێویستە ھەولێر و بەغدا لەبارەی پرسی کێشەی مووچەی مووچەخۆرانی ھەرێم بگەنە ڕێککەوتن.

قاسم ئەعرەجی لە میانی سەردانیکردنی بۆ ناوچەی بارزان لە کۆنگرەیەکی ڕۆژنامەوانییدا گوتی: "پێویستە ھەولێر و بەغدا لەبارەی پرسی کێشەی مووچەی مووچەخۆرانی ھەرێمى کوردستان بگەنە ڕێککەوتن".

ڕاشیگەیاند کە گرنگە پرسە ھەڵپەسێردراوەکانی نێوان حکوومەتی ھەرێم و حکوومەتی فیدراڵیی بەپێی دەستوور چارەسەر بکرێن.

باسی لەوەش کرد، لێکۆڵینەوەکان بەردەوامن لەبارەی ئەو ھێرشانەی کە بەم دواییانە لە ڕێگای ئاراستەکردنی فڕۆکەی بێفڕۆکەوان کرانە سەر ھەرێمی کوردستان و ناوچەکانی دیکەی عێراق.

گوتیشی: "لە میانی سەردانەکەم بۆ ھەولێر، دۆخی ئێستای ناوچەکەم لەگەڵ سەرکردە و بەرپرسانی ھەرێم تاوتوێ کردووە".

دوێنێ چوارشەممە ڕاوێژکاری ئاسایشی نەتەوەیی عێراق، قاسم ئەعرەجی بەسەردانێک گەیشتە ھەولێر و لە میانیدا زنجیرەیەک دیدار و کۆبوونەوەی لەگەڵ بەرپرسانی باڵای ھەرێم ئەنجام دا.