ئیستانبوڵ ــ AA

نەتەوە یەکگرتووەکان ڕایگەیاند کە ئێستا کاتی ئەوەيە ڕێگا بدرێت بەشێوەیەکی فراوان یارمەتییە مرۆییەکان بگەیەندرێنە غەززە.

کۆمیسیاری گشتی ئاژانسی نەتەوە یەکگرتووەکان بۆ بەھاناوەچوون و کارپێکردنی پەنابەرانی فەڵەستین (UNRWA)، فیلیپ لازارانی لە ھەژماری خۆی لە تۆڕی کۆمەڵایەتی ئێکس لەبارەی پڕۆسەی ئاڵوگۆڕی دیلەکانی نێوان ئیسرائیل و حەماس، نووسیوویەتی: "لە کۆتاییدا، ڕۆژێکی پڕ لە ھەستی ئەرێنی و دیداری خێزانە ئیسرائیلی و فەڵەستینییەکان (لەگەڵ کەسوکارەکانیان) دوای زیاتر لە دوو ساڵ لە تاریکی، تروسکایی ھیوایان بەخشیووە".

ڕاشیگەیاندووە کە ئێستا کاتی ئەوەیە، داھاتوویەکی ئاشتی لە ڕێگەی چارەسەرکردن و دادپەروەری و دانپێدانانی یەکترەوە (ئیسرائیل-فەڵەستین)، بنیات بندرێت.

ھەروەھا نووسیوویەتی: " ئێستا کاتی ئەوە ڕێگا بدرێت بەشێوەیەکی فراوان یارمەتییە مرۆییەکان لە ڕێگای (UNRWA)وە، بگەیەندرێنە غەززە".