بانگکۆک - AA

سەرکردەکانی ئاسیا-زەریای هێمن، لە لووتکەی هاریکاری ئابووریی ئاسیا-زەریای هێمن کە لە تایلاند بەڕێوەدەچێت، داوایان کرد کۆتایی بهێنرێت بەو جەنگەی رووسیا بەڕووی ئۆکراینادا کردوویەتەوە.

لە راگەیەندراوێکدا کە لەلایەن هاریکاری ئابووریی ئاسیا-زەریای هێمنەوە بڵاوکراوەتەوە، باس لە کاریگەرییە نەرێنییەکانی جەنگی رووسیا-ئۆکراینا کراوە.

هەروەها لە راگەیەندراوەکەدا جەخت لەسەر ئەوە کراوەتەوە کە رەنگە بابەتەکانی پەیوەست بە جەنگ و ئاسایش دەرەنجامی جددیان هەبێت بۆ ئابووریی جیهانیی و، زۆرێک لە وڵاتانیش ئیدانەی جەنگی ئۆکراینایان کرد.

لە راگەیەندراوەکەدا ئاماژە بەوەیش کراوە کە جەنگەکە بووەتە هۆی هەڵئاوسانی قووڵ و نەبوونی ئاسایشی خۆراک و کێشە لە زنجیرەی دابینکردندا، هاوکات بەیاننامەی ئەنجوومەنی گشتیی نەتەوەیەکگرتووەکانیش خراوەتەڕوو کە لە دووی ئاداردا بڵاوریکردەوە و دەڵێت: ''داوادەکرێت دەستبەجێ و بە تەواوی و بێ مەرج هەموو هێزە سەربازییەکانی رووسیای فیدراڵ لە خاکی ئۆکراینا بکشێنەوە''.