زێلێنسکی: ''رووسیا ئامادەکاری کردووە بۆ هێرشی نوێی مووشەکیی بۆسەر ئۆکراینا''
سەرۆکی ئوکراینا، ڤلۆدۆیمیر زێلێنسكی: ''بە درێژایی ئەم هەفتەیەش قورسترین پێکدادان لە بەرەی دۆنێتسک بەردەوام بووە و دۆخی ئەو بەرەیە زۆر سەختە''.
Kiev
کیێڤ - AA
سەرۆکی ئوکراینا، ڤلۆدۆیمیر زێلێنسكی بانگەشەی ئەوەی کرد کە سوپای رووسیا ئامادەکاری کردووە بۆ ئەنجامدانی هێرشی نوێی مووشەکیی بۆسەر ژێرخانە مەدەنییەکان و وزەی ئۆکراینا.
ڤلۆدۆیمیر زێلێنسكی لە پەیامی ڤیدیۆیی رۆژانەیدا کە کاتەکانی شەو لە هەژماری خۆی لە تیلیگرام بڵاوی کردەوە، بەردەوامی جەنگی رووسیا-ئۆکراینای وەبیرهێنایەوە و ئاماژەی بەوە کرد کە وەک ماوەی رابردوو، بە درێژایی ئەم هەفتەیەش قورسترین پێکدادان لە بەرەی دۆنێتسک بەردەوام بووە و گوتی:
''دۆخی ئەو بەرەیە زۆر سەختە''.
سەرۆکی ئۆکراینا باسی لەوە کرد کە هەفتەی رابردوو، دووبارە رووسیا هێرشی کردووەتەوە سەر ژێرخانە مەدەنییەکان و وزەی ئۆکراینا.
زێلێنسکی هەروەها باسی لەوە کرد کە بەچڕی کاریان کردووە بۆ چاککردنەوەی ئەو کێشانەی بەهۆی هێرشەکانەوە لە کەرتی وزەدا دروست بووە.
سەرۆکی ئۆکراینا بانگەشەی ئەوەی کرد کە رووسیا ئامادەکاری کردووە بۆ ئەنجامدانی هێرشی نوێ و گوتی: ''تێدەگەین کە تیرۆریستان ئامادەکارییان کردووە بۆ ئەنجامدانی هێرشی نوێ. بەدڵنیایییەوە ئەوە دەزانین، بەداخەوە هەتا مووشەکیان هەبێت ئارام نابنەوە''.
