واشنتۆن ــ AA

سەرۆکی ئەمریکا، دۆناڵد ترەمپ ڕایگەیاند، ئەگەر لەگەڵ ئێران نەگەنە ڕێککەوتن، ئەوە ئاکامەکەی زۆر سەخت دەبێت.

دۆناڵد ترەمپ لە ھەژماری خۆی لە تۆڕی کۆمەڵایەتی "Truth Social" ئەو بانگەشەیەی ڕەت کردووەتەوە کە باس لەوە دەکات، گوایە سەرۆکی ئەرکانی ھاوبەشی سوپای ئەمریکا، جەنەراڵ دان کاین دژی ھێرشی سەربازییە بۆ سەر ئێران.

ڕاشیگەیاندووە تەنھا خۆی بڕیاری لەبارەی ئێران دەدات و نووسیوویەتی: "ئەگەر بڕیاری ھێرشکردنە سەر ئێران بدەم، ئەوە دان کاین پێوەی پابەند دەبێت و سوپای ئەمریکاش بە کارامەیی جێبەجێی دەکات".

باسی لەوەش کردووە: " جەنەراڵ دان کاین وەک ھەمووان، نایەوێت جەنگ ببینێت، بەڵام لەو باوەڕەدایە ئەگەر بڕیارێکی سەربازی لە دژی ئێران بدرێت، ئەوە سەرکەوتن تیایدا ئاسان دەبێت".

ھەروەھا دۆناڵد ترەمپ پەیامێکی ئاراستەی سەرکردەکانی ئێران کردووە و ڕایگەیاندووە: "من بڕیار دەدەم و باشتر وایە ئێوە بگەین بە رێککەوتن، ئەگەر نا ئەوە ئاکامەکەی بۆ ئێران و گەلەکەی زۆر سەخت دەبێت".